Azərbaycan, Bakı, 06 mart/ Trend , müxbir İ.Əlizadə/ MDB ölkələrinin terrorçuluq, cinayətkarlıq və narkobizneslə mübarizə sahəsində qanunvericiliyin uyğunlaşdırılması məsələsi MDB Parlamentlərarası Assambleyasının daimi komissiyalarında müzakirə olunacaq. Bu barədə cümə axşamı Milli Məclisin mətbuat xidmətindən məlumat verilib.
Martın 10-dan 14-dək Sankt-Peterburqda MDB Parlamentlərarası Assambleyasının Müdafiə və Təhlükəsizlik, Dövlət quruculuğu və yerli özünüidarəetmə təcrübəsinin öyrənilməsi üzrə daimi komissiyalarının, eləcə də MDB-də terrorizm, cinayətkarlıq və narkobizneslə mübarizə sahəsində qanunvericiliyin uyğunlaşdırılması üzrə birgə komissiyanın iclasları keçiriləcək.
İclaslarda MDB-yə üzv olan dövlətlərin sərhədyanı əməkdaşlığı haqqında Konvensiya, korrupsiya, terrorizm və ekstremizmlə mübarizə üsulları haqqında model qanun layihələri müzakirə olunacaq.
İclaslarda Azərbaycanı Milli Məclisin üzvü Fəzail Ağamalı təmsil edəcək.