...

Dövlət Komitəsi müxalifət partiyasını qərargahla təmin edəcək

Siyasət Materials 9 Aprel 2008 11:18 (UTC +04:00)

Azərbaycan, Bakı, 09 aprel / Trend ", müxbir Q.Cəbiyev/ Dövlət Əmlakının İdarə Edilməsi üzrə Dövlət Komitəsi yaxın günlərdə müxalif Böyük Quruluş Partiyasını (BQP) qərargahla təmin edəcək. Bu barədə çərşənbə günü Trend a BQP sədri, millət vəkili Fazil Qəzənfəroğlu məlumat verib.

BQP qərargah probleminin həlli üçün iki dəfə Dövlət Komitəsinə müraciət edib. Bir müddət öncə Komitə BQP-yə yer ayırsa da, həmin yer şəhərin kənarında olduğu üçün ondan imtina edilib.

Qəzənfəroğlunun sözlərinə görə, onların ikinci müraciətinə Dövlət Komitəsi tərəfindən reaksiya verilib. "Komitədən bildiriblər ki, yaxın günlərdə qərargahla bağlı alternativ binalar təqdim olunacaq. Onların içərisindən ən uyğununu seçib bir aya təmir işlərini yekunlaşdırıb, qərargah problemini həll edəcəyik" Qəzənfəroğlu əlavə edib.

Onun sözlərinə görə, indiyə qədər partiyanın qərargahının olmaması partiyanın oktyabrda keçiriləcək prezident seçkisinə hazırlıq işlərini yubadır.

BQP 2004-cü ildə Qəzənfəroğlu tərəfindən təsis olunub. Partiya 2005-ci il parlament seçkisində iştirak edib və Milli Məclisdə bir yer qazanıb. Qəzənfəroğlu prezident seçkisində namizədliyini irəli sürmək niyyətini bəyan edib.

Məqalə müəllifi ilə əlaqə ünvanı: [email protected]

Xəbər lenti

Xəbər lenti