Azərbaycan, Bakı,10 aprel / Trend , müxbir S.Ağayeva/ Qara Dəniz İqtisadi Əməkdaşlıq Təşkilatına (QİƏT) üzv-ölkələrin xarici işlər nazirləri Ukraynanın təşkilata sədrliyinin yekunlarını nəzərdən keçirəcək. QİƏT Nazirlər Şurasının iclası aprelin 17-də Kiyev şəhərində keçiriləcək.
Ukrayna QİƏT-ə sədrliyi keçən il noyabrın 1-dən həyata keçirir. QİƏT üzv-ölkələrinin XİN başçıları keçən dövr ərzində daimi beynəlxalq katiblik və İşçi orqanların işini nəzərdən keçirməyi planlaşdırır.
Azərbaycanı iclasda xarici işlər nazirinin müavini Mahmud Məmmədquliyevin təmsil edəcəyi gözlənilir.
QİƏT Qara dəniz hövzəsi ölkələrinin ticarət və iqtisadi inkişaf, nəqliyyat, telekommunikasiya, rabitə, turizm və ekologiya kimi sahələrdə çoxtərəfli əməkdaşlığının yaradılması üçün Türkiyənin təşəbbüsü ilə yaradılıb. Təşkilatın daimi üzvləri bunlardır: Azərbaycan, Albaniya, Ermənistan, Bolqarıstan, Yunanıstan, Gürcüstan, Moldova, Rusiya, Rumıniya, Serbiya, Türkiyə, Ukrayna. Təşkilatda müşahidəçi statusunda 13 ölkə çıxış edir: Avstriya, Belarus, Almaniya, Misir, İsrail, İtaliya, Polşa, Slovakiya, ABŞ, Xorvatiya, Tunis, Fransa, Çexiya.
Müəlliflə əlaqə saxlamaq üçün elektron ünvan: [email protected]
