Azərbaycan, Bakı, 21 aprel / Trend , müxbir S.İlhamqızı/ Müxalifətçi Azərbaycan Milli İstiqlal Partiyasının (AMİP) baş katibi Fuad Muxtarov hesab edir ki, Ayaz Rüstəmovun sədrliyi dövründə partiyanın fəaliyyətindəki uğursuzluqlar məhz sədrin özü ilə bağlı olub.
"Keçmiş sədr öz fəaliyyətindəki uğursuzluqları başqalarının ayağına yazmamalıdır"-deyə Muxtarov bazar ertəsi Trend ə açıqlamasında bildirib.
AMİP-in keçmiş sədri Rüstəmov ötən ilin sonunda vəzifəsindən istefa vermişdi. AMİP-ə yeni sədr seçmək üçün partiyanın fövqəladə qurultayı keçiriləcək.
Rüstəmov Trend ə açıqlamasında bildirib ki, AMİP ciddi və nüfuzlu bir partiya olduğu üçün onun sədrliyinə namizədlərə senzura tətbiq edilməli, partiyanın ali orqanları sədrliyə iddialı şəxslərin layiqli olub-olmamasına dair rəy verməlidir.
Rüstəmov həmçinin bildirib ki, öz sədrliyi dövründə komandasında çalışmış, özü ilə birgə partiya rəhbərliyində, idarəçiliyində təmsil olunmuş şəxslər də AMİP sədrliyinə iddia etməməlidirlər. Bu şəxslər AMİP-in baş katibi Muxtarov və Mərkəzi Şuranın sədri Əli Ələkbərovdur: "Bu iki şəxsin namizədliyini mən irəli sürmüşdüm. Mənim sədrliyim dövründə AMİP-in fəaliyyəti tənqid olunurdu, guya fəaliyyətimiz partiya üzvlərini qane etmirdi. Deməli, mənimlə birgə çalışan baş katib və Mərkəzi Şuranın sədri də partiyanın idarəçiliyində qənaətbəxş fəaliyyət göstərməyiblər və belə çıxır ki, AMİP-in sədri kimi də fəaliyyətləri qaneedici olmayacaq. Ona görə də onlar sədrliyə namizəd olmamalıdırlar"-deyə Rüstəmov bildirib.
Rüstəmovun fikrincə, onun komandasından olmuş şəxslər AMİP-in sədri seçiləcəksə, bu, partiyada yenidən narazılıqlar yaradacaq.
Muxtarov isə keçmiş sədrin bu arqumentləri ilə razılaşmır və hesab edir ki, Rüstəmov yanlış fikirdədir: "Ayaz Rüstəmovun sədrliyi dövründə yalnız onun fəaliyyətindən narazılıqlar var idi. Çünki səhhəti ilə əlaqədar işə gec-gec gəlirdi, partiyanı zəif idarə edirdi. Partiya katibliyi isə sədrlik institutundan ayrı bir qurumdur və katiblikdən narazılıqlar olmayıb. Ayaz Rüstəmov komandasını səfərbər edərək partiyada mükəmməl şəkildə idarəçilik yaratmayıbsa, buna görə başqa şəxsləri günahlandırması, bizi kənara çəkilməyə çağırması tamamilə yanlış hərəkətdir"- deyə Muxtarov bildirib.
AMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Müxalifəti təmsil edən AMİP-in qurucusu və 2004-cü ilin sonunadək sədri olan Etibar Məmmədov hazırda Beynəlxalq Demokrat İttifaqının (BDİ) sədr müavinidir.
Müəlliflə əlaqə saxlamaq üçün elektron ünvan - [email protected]