Azərbaycan, Bakı, 21 aprel / Trend , müxbir C.Babayeva/ Azərbaycanın müxalif Müasir Müsavat Partiyası mayın ilk on günlüyündə sosial-iqtisadi tələblərlə Bakıda mitinq keçirmək niyyətindədir. Bu barədə bazar ertəsi Trend -a partiyanın sədri, Azərbaycan prezidentliyinə namizədliyini irəli sürmək niyyətində olan Hafiz Hacıyev məlumat verib.
Azərbaycanda prezident seçkisi oktyabrın 15-də keçiriləcək.
Müxalifət düşərgəsindən Müsavat Partiyasının sədri İsa Qəmbər, Demokrat Partiyasının sədri Sərdar Cəlaloğlunun prezidentliyə namizədliyi irəli sürülüb.
Hakim Yeni Azərbaycan Partiyası seçkidə partiyanın sədri, prezident İlham Əliyevin namizədliyini irəli sürəcəyini bəyan edib.
Hacıyevin sözlərinə görə, bazar ertəsi mitinqin keçirilməsi ilə bağlı Bakı Şəhər İcra Hakimiyyətinə müraciət olunacaq.
"Müraciətdə mitinqin keçirilməsi üçün N.Nərimanov adına kinoteatrın qarşısındakı meydan, "Ukrayna" meydanı və "Gənclik" metrostansiyası yaxınlığındakı meydan təklif olunacaq", deyə Hacıyev bildirib.
Partiya sədrinin sözlərinə görə, mitinqdə Müasir Müsavat Partyiasının on min tərəfdarının iştirakı planlaşdırılır. "Partiya icazəsiz mitinq keçirmək niyyətində deyil", deyə Hacıyev qeyd edib.
Hacıyevin bildirdiyinə görə, mitinqdə həmçinin ATƏT-in Minsk Qrupunun fəaliyyətinə etiraz bildiriləcək. ATƏT-in Minsk Qrupunda təmsil olunan Rusiya, Fransa və ABŞ martın 14-də BMT-nin Baş Assambleyasının sessiyasında qəbul olunmuş "Azərbaycanın işğal olunmuş ərazilərindəki vəziyyət haqqında" Qətnamənin əleyhinə səs verib.
Müasir Müsavat Partiyası 2000-ci ildə təsis olunub. 2002-ci ildə dövlət qeydiyyatına alınıb. Partiya özünü hakimiyyətə konstruktiv müxalifət hesab edir. Hacıyev partiyanın yarandığı gündən sədridir. 90-cı illərdə balıq təsərrüfatı üzrə Dövlət Konserninə rəhbərlik edib. Hacıyev 1993-cü ildə səlahiyyətlərindən sui-istifadədə günahlandırılaraq beş il yarım müddətinə həbsə alınıb. 18 aydan sonra vaxtından əvvəl azadlığa buraxılıb və 1995-ci ildə yenidən həbs olunaraq, qanunsuz silah saxlamağa görə üç il müddətinə azadlıqdan məhrum olunub.
