Azərbaycan, Bakı, 23 aprel/ Trend , müxbir İ.Əlizadə/ Azərbaycan müxalifətini təmsil edən Açıq Cəmiyyət Partiyası (ACP) təşkilatı dövlət qeydiyyatına almadığına görə, Ədliyyə Nazirliyini məhkəməyə verəcək. "ACP dövlət qeydiyyatına alınmaq üçün lazım olan bütün sənədləri hazırlayaraq bir il əvvəl Ədliyyə Nazirliyinə təqdim edib. Lakin nazirlik partiyanı dövlət qeydiyyatına almaqdan imtina edir. Ona görə də bir müddət də gözlədikdən sonra Ədliyyə Nazirliyini məhkəməyə verəcəyik", -deyə çərşənbə günü Trend -a açıqlamasında ACP sədrinin müavini Yaqub Abbasov bildirib.
ACP 2007-ci ilin aprelində təsis olunub.
Abbasov qeyd edib ki, partiyanın dövlət qeydiyyatına alınması məsələsi ilə əlaqədar olaraq Ədliyyə Nazirliyinin nümayəndələri ilə görüşüb: "Nazirliyin nümayəndələri bildirdilər ki, partiyanın təqdim etdiyi sənədlərdə hər hansı çatışmazlıq yoxdur və qeydiyyat problemi həll olunacaq. Lakin xeyli müddət keçməsinə baxmayaraq, partiyanı qeydiyyata almırlar".
O qeyd edib ki, ACP payızda keçiriləcək prezident seçkilərinə qədər qeydiyyat problemini həll etmək istəyir. Çünki dövlət qeydiyyatının olmaması partiyanın fəaliyyətinə mane olur.
Ədliyyə Nazirliyinin məsələyə dair mövqeyini öyrənmək mümkün olmayıb.
Sağ mərkəzçi, müxalifətyönlü ACP 2007-ci ilin aprelində təsis olunub. Partiyanın lideri Azərbaycanın eks-spikeri, hazırda ABŞ-da mühacirətdə yaşayan Rəsul Quliyevdir. Bu ilin fevralınadək ADP-nin sədri olmuş Rəsul Quliyev və onun tərəfdarları etiraz olaraq ADP-dən imtina edərək özlərinin Açıq Cəmiyyət Partiyasını yaradıblar.
Məqalə müəllifi ilə əlaqə ünvanı: [email protected]
