Azərbaycan, Bakı, 24 aprel/ Trend , müxbir İ.Əlizadə/ Azərbaycan müxalifətini təmsil edən Açıq Cəmiyyət Partiyası (ACP) partiya sədrlərini müxalifəti parçalamaqda ittiham edir. "İddiaları ilə imkanları üst-üstə düşməyən partiya sərdləri müxalifəti çıxılmaz vəziyyətə salıblar", -deyə cümə axşamı Trend -a açıqlamasında ACP sədrinin müavini Yaqub Abbasov bildirib.
Abbasov qeyd edib ki, ACP lideri, hazırda ABŞ-da mühacirətdə olan eks-spiker Rəsul Quliyev istisna olmaqla müxalifət liderlərindən heç biri prezident seçkisində hakimiyyətin namizədi ilə mübarizə aparıb, qalib gəlmək şansına malik deyil: "Ona görə də müxalifət liderləri Rəsul Quliyevin ətrafında birləşməli və onun namizədliyini müdafiə etməlidirlər. Lakin müxalifət liderləri özlərində cəsarət tapıb, bunu etiraf etmək istəmirlər. Rəsul Quliyevdən başqa heç bir müxalifət lideri prezident seçkisində qalib gələ bilməz".
Sədr müavini bildirib ki, Quliyev 2003-cü ilin prezident seçkisində Müsavat Partiyasının başqanı İsa Qəmbərin namizədliyini müdafiə edib: "Lakin İsa Qəmbər hakimiyyətə gələ bilmədi. İndi onun namizədliyi necə müdafiə oluna bilər? İsa Qəmbər də geri çəkilməli və Rəsul Quliyevi müdafiə etməlidir".
Abbasov qeyd edib ki, 2008-ci ilin prezident seçkilərində iştirak etmək istəyən müxalifət liderlərinin əsas məqsədi, seçkilərdə mübarizə aparmaq deyil, şəxsi maraqları naminə pul qazanmaqdır. Onun fikrincə, müxalifətdən olan namizədlər seçkinin alternativ əsasda keçirildiyi görüntüsü yaratmaq üçün seçkiyə qatılırlar və demokratiyanın imitasiyası ilə məşğul olurlar.
"Rəsul Quliyev 2003-cü ildə İsa Qəmbərin ən şanslı namizəd olduğunu görərək, Müsavat başqanını dəstəklədi. Hesab edirəm ki, qarşıdan gələn prezident seçkisində də Rəsul Quliyev İsa Qəmbərin namizədliyini müdafiə edəcək", -deyə başqan Qəmbərin prezidentliyə namizədliyini irəli sürən Müsavat Partiyası Məclisinin sədri Sülhəddin Əkbər bildirib.
O bildirib ki, Quliyev prezidentliyə namizədliyini irəli sürməyib. Eks-spiker namizədliyini irəli sürmədiyinə və Azərbaycana qayıtmadığına görə, Müsavatın onu müdafə etməsi hazırda müzakirə oluna bilməz: "Əgər Rəsul Quliyev namizədliyini irəli sürsə və Azərbaycana qayıtsa, Müsavatın onu müdafiə etməsinə baxıla bilər. Hələlik isə bunların heç biri yoxdur".
Əkbər prezidentliyə namizədlərin hakimiyyətdən pul almaq üçün seçkiyə qatılmasını "qeyri-ciddi" söhbət adlandırıb: "Hər halda bu, Müsavat Parttiyasına aid deyil".
Prezidentliyə namizədliyini irəli sürən müxalif Ümid Partiyasının sədri, deputat İqbal Ağazadə ACP rəsmisini danışdığı sözün məsuliyyətini dərk etməyə çağırıb: "Biz Azərbaycanda siyasi proseslərin içindəyik və mübarizə aparırıq. Yaqub Abbasov kimin yanında olduğuna nəzər yetirsin. Rəsul Quliyev həbsə düşəcəyindən qorxaraq Azərbaycana gələ bilmir, gəlmək istəmir. Prezidentlik uğrunda mübarizə aparmaq çətinliklərlə üzləşmək, həbsə düşmək deməkdir. Həbsə düşəcəyindən qoxan şəxsin namizədliyi necə müdafiə oluna, ona necə ölkə tapşırıla bilər? Onlar sözlərinə sərhəd qoymalıdırlar və bizi məcbur etməsinlər ki, bildiklərimizi danışaq".
Ağazadə hesab edir ki, Azərbaycan müxalifətində iddiaları ilə imkanları üst-üstə düşməyən əsas şəxs Quliyevdir.
"Rəsul Quliyev əvvəlcə, öz evinə gəlsin, sonra müxalifətin onun namizədliyini dəstəkləməsi haqqında danışsınlar. Rəsul Qulyev Azərbaycana gəlsə, mən gedib onun yanında dayanmağa hazıram. ABŞ-da prezidentliyə namizəd Con Makkeyindir. Mən gedib, onun yanıda dayanası deyiləm ki? "
Sağ mərkəzçi, müxalifətyönlü ACP bu ilin aprelində təsis olunub. Partiyanın lideri Azərbaycanın eks-spikeri, hazırda mühacirətdə yaşayan Quliyevdir. Bu ilin fevralınadək ADP-nin sədri olmuş Quliyev və onun tərəfdarları etiraz olaraq ADP-dən imtina edərək özlərinin Açıq Cəmiyyət Partiyasını yaradıblar.
Məqalə müəllifi ilə əlaqə ünvanı: [email protected]
