Azərbaycan, Bakı, 13 may / Trend , müxbir C.Babayeva/ Müxalifəti təmsil edən "Bizim Azərbaycan" bloku prezident seçkisində kənar namizədi dəstəkləyə bilər. Bu barədə çərşənbə axşamı Trend -a blokun sədri Vüqar Bəyturan məlumat verib.
Azərbaycanda prezident seçkisi oktyabrın 15-də keçiriləcək.
Müxalifət düşərgəsindən Müsavat Partiyasının sədri İsa Qəmbərin, Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin prezidentliyə namizədliyi irəli sürülüb. Hakim Yeni Azərbaycan Partiyası seçkidə partiyanın sədri, prezident İlham Əliyevin namizədliyini irəli sürəcəyini bəyan edib.
Bəyturanın sözlərinə görə, "Bizim Azərbaycan" bloku indiyə qədər prezident seçkisində iştirak qərarı qəbul etmiş namizədlərdən heç birini dəstəkləməyəcək.
"Blok Azərbaycan ictimaiyyətində tanınmış, ənənəvi müxalifət liderlərindən fərqlənən namizədi dəstəkləyə bilər",- deyə Bəyturan bildirib.
Onun sözlərinə görə, "Bizim Azərbaycan" blokunun seçkidə iştirak forması ilə bağlı yekun qərarı blok məclisinin mayın 26-da keçiriləcək növbəti toplantısında veriləcək. Bəyturan blokun prezident seçkisinə öz namizədi ilə qatılacağını istisna etməyib.
"Bizim Azərbaycan" bloku 2003-cü il keçirilən prezident seçkiləri dövründə prezidentliyə namizəd olan Müsavat Partiyasının başqanı İsa Qəmbərin namizədliyini dəstəkləmək üçün yaradılıb. Sonradan Müsavat Partiyası bloku tərk edib. Hazırda "Bizim Azərbaycan" blokunda səkkiz partiya təmsil olunur.
Məqalə müəllifi ilə əlaqə saxlamaq üçün ünvan - trend
