Azərbaycan, Bakı, 14 may / Trend , müxbir C.Babayeva/ Bakı Şəhər İcra Hakimiyyəti (BŞİH) müxalifətyönlü Böyük Quruluş Partiyasına (BQP) mayın 16-da Dövlət Əmlakının İdarə Edilməsi üzrə Dövlət Komitəsinin qarşısında piket keçirməsinə icazə verməyib. Ba barədə çərşənbə günü Trend -a partiyanın Ali Məclisinin sədri Əjdər Əliyev məlumat verib.
BQP-nin yarandığı vaxtdan indiyədək daimi qərargahı olmayıb. Partiya ayrı-ayrı ünvanlarda icarə haqqı ödəməklə, müvəqqəti obyektlərdə yerləşib. Hazırda isə, icarə haqqı ödməyə maddi imkanı olmadığından, partiya qərargahsız qalıb.
Partiyanın sədri Fazil Qəzənfəroğlu partiyanın qərargahla təmin olunması üçün ötən il Dövlət Əmlakının İdarə Edilməsi üzrə Dövlət Komitəsinə müraciət edib, lakin Komitənin təklif etdiyi yer partiyanı qane etməyib.
Əliyevin sözlərinə görə, BŞİH-nin cavab məktubunda partiyanın Dövlət Komitəsinin qarşısında piket keçirməsinin məqsədəuyğun olmadığı bildirilib.
Qəzənfəroğlunun dünən Trend -a bildirdiyinə görə, piketin keçirilməsinə Bakı Şəhər İcra Hakimiyyəti tərəfindən icazə verilməsə, BQP məhkəməyə müraciət edəcək.
Müxalifətyönlü BQP 2004-cü ildə yaradılıb, 2005-ci ildə dövlət qeydiyyatına alınıb. Partiyanın sədri Fazil Qəzənfəroğlu Milli Məclisin deputatıdır.
Məqalə müəllifi ilə əlaqə saxlamaq üçün ünvan - trend
