Azərbaycan, Bakı, 05 iyun/ Trend , müxbir E.Babayev/ / Müxalif Azərbaycan Demokrat Partityasının (ADP) öz namizədi ətrafında seçki bloku yaratmaq ideyası baş tutmayıb. "Seçki Məcəlləsinə son əlavə və dəyişikliklərdən sonra bizim danışıqlar aparıdığımız şəxslərdə ruh düşkünlüyü yaranıb və bu məsələ hazırda gündəmdən çıxıb", -deyə cümə axşamı Trend -a ADP sədri Sərdar Cəlaloğlu bildirib.
Trend -un arayışı: Azərbaycanda prezident seçkiləri oktyabrın 15-də keçiriləcək. İndiyə qədər Müsavat Partityasının başqanı İsa Qəmbərin, ADP sədri Sərdar Cəlaloğlunun, Yaşıllar Partiyasının sədri Mais Güləliyevin namizədliyi təmsil olunduqları partiyalar tərəfindən irəli sürülüb. Bundan başqa, Azərbaycan Naminə İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası hazırki dövlət başçısı İlham Əliyevin namizədliyini irəli sürmək niyyətindədir. Üç müxalifət partiyasının (Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə, seçkiləri boykot edəcəyi barədə bəyanat verib.
Cəlaloğlu bildirib ki, Seçki Məcəlləsinə dəyişikliklər sırasında prezidentliyə namizədlərin depozit qoyma şərtinin götürülməsi, seçki təbliğatının 120 gündən 75 günə endirilməsi, dövlət televiziyasında namizədlərə pulsuz efir vaxtına qadağa qoyulması kimi məsələlərin yer alması danışıqlar apardığı şəxslərin mövqeyini dəyişib. "Belə bir rəy yaranıb ki, seçki yolu ilə dəyişiklik etmək mümkün deyil. Artıq əksəriyyət seçkiyə qeyri-ciddi bir proses kimi yanaşır" - deyən Cəlaloğlu qeyd edib ki, koalisiya yaratmaq ideyasından sonradan Müsavat Partityası, eləcə də digər seçkiyə qatılan şəxslər tərəfindən yararlanmağa başladılar. "Baxmayaraq ki, onlar ilk vaxtlar bizim ideyamızı bu və ya digər formada qəbul etmirdilər, sonradan özləri koalisiya, "kölgə kabineti" yaradacaqlarını bildirdilər. Bu da bizə məxsus ideyanın effektivliyini azaltdı" -deyə Cəlaloğlu qeyd edib.
Sağ təmayüllü partiya olan ADP 1991-ci ildə Sərdar Cəlaloğlu tərəfindən təsis edilib. Partiya bu ilin yanvarınadək iqtidara qarşı radikal müxalif mövqedə olub. Yanvarda ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq, keçmiş sədr Rəsul Quliyev və tərəfdarları ADP-dən imtina edərək, özlərinin Açıq Cəmiyyət Pariyasını yaradıblar
Məqalə müəllifi ilə əlaqə ünvanı: [email protected]