Türkiyə, Ankara, 23 iyun / Trend , müxbir T.Əliyev/ Azərbaycan və Rusiya sərhədlərinin delimitasiyası və demarkasiyası üçün ekspertlər səviyyəsində dəqiqləşdirmələr aparılır. "Azərbaycanla Rusiya arasında sərhədlərin müəyyənləşdirilməmiş təxminən 20 hektardan artıq ərazisi qalıb. Ekspertlər çalışırlar və diplomatik kanallarla görüşün vaxtı dəqiqləşdikdən sonra razılaşdırılmamış ərazilərin müəyyənləşdirilməsini də çözəcəyik", Türkiyədə səfərdə olan Dövlət Torpaq və Xəritəçəkmə Komitəsinin sədri Qərib Məmmədov Trend -a eksklüziv açıqlamasında bildirib.
Trend -un arayışı: Azərbaycan və Rusiya sərhədlərinin müəyyənləşdirilməsi üçün iki ölkə arasında dövlət komissiyaları fəaliyyət göstərir. Hələlik hər iki ölkənin sərhədyanı ərazisinin 95 faizi razılaşdırılıb.
Məmmədov deyib ki, Rusiya ilə razılaşdırılmamış təxminən 3 sahə qalıb. Bunlardan biri "stık" adlanan ərazidir. Bu, Balakən rayonunun ərazisində Rusiya, Gürcüstan və Azərbaycanın sərhədlərinin birləşdiyi yerdir.
İkinci, "Su qovşağı" adlanan ərazidir, orada da böyük bir iş qalmayıb, ekspertlərin müəyyən rəyləri var. Üçüncüsü isə Xacmaz rayonu ərazisindəki meşə sahəsidir.
Komitə sədri bildirib ki, Gürcüstanla Azərbaycan sərhədlərinin müəyyənləşdirilməsi üçün bu yaxınlarda mütəxəssislər razılaşdırılmamış ərazilərdə olublar. Onun sözlərinə görə, ilin sonunadək delimitasiya üzrə Azərbaycan-Gürcüstan komissiyasının daha bir iclasının keçirilməsi nəzərdə tutulur.
Trend -un arayışı: Azərbaycan və Gürcüstan arasında dövlət sərhədlərinin 470 km-dən 170 km-i hələ də razılaşdırılmayıb.
Məqalə müəllifi ilə əlaqə ünvanı: [email protected]