Azərbaycan, Bakı, 30 iyun/ Trend , müxbir E.Babayev/ Azərbaycanda seçici siyahıları ilə bağlı şikayətlərin sayı kütləvi hal almır. "İndiyə qədər son seçici siyahısı ilə bağlı Mərkəzi Seçki Komissiyasında (MSK) yaradılan "qaynar xətt"ə cəmi 300-ə yaxın müraciət daxil olub. Bu göstərici ötən illərlə müqayisədə azdır", - deyə bazar ertəsi Trend -a MSK-nın nəzdində fəaliyyət göstərən Seçkilər İnformasiya Mərkəzinin rəhbəri Ramil Hüseynov bildirib.
Trend -un arayışı: MSK may ayının sonu keçirilən iclasında yeni tərtib olunan seçici siyahılarını təsdiqləyib. Təsdiq olunan siyahıya əsasən, siyahıda 4 milyon 834 min 584 seçici qeydə alınıb. Siyahıya düşən seçicilərin 52 faizi qadın, 48 faizi isə kişidir.
Ötən il tərtib olunan seçici siyahısında 4 mln.600 mindən çox seçici qeydə alınmışdı.
Hüseynov bildirib ki, daxil olan şikayətlərin təqribən 100-110-u təmin olunub. Yəni adları siyahıda olmayan şəxslərin adı siyahıya salınıb. Digər müraciətlər isə texniki xarakter daşıyıb. Belə ki, bəzi şəxslər müraciət edərək soyadlarında olan orfoqrafik səhvlərin düzəldilməsini xahiş ediblər, bəziləri isə harada səs verəcəkləri ilə maraqlanıblar. "Biz müraciətləri qəbul etməkdə davam edirik. Seçici siyahıları hələlik internetdə yerləşdirilib. Seçki gününə 65 gün qalmış isə siyahılar məntəqə seçki komissiyalarında asılacaq", - deyə o əlavə edib.
Azərbaycanda prezident seçkisi oktyabrın 15-də keçiriləcək.
Məqalə müəllifi ilə əlaqə ünvanı: [email protected]