Azərbaycan, Bakı, 01 iyul/ Trend , müxbir E.Babayev / Müxalif Azərbaycan Demokrat Partiyası (ADP) bölgələrdə prezident seçkisinə hazırlıqla bağlı toplantılar keçirməyə başlayır. "İlk belə toplantımız bu gün Şimal bölgəsində olacaq", - deyə çərşənbə axşamı Trend -a partiya sədri Sərdar Cəlaloğlu bildirib.
Trend -un arayışı: ADP Ali Məclisi bu il fevralın 16-da prezident seçkisində iştirak qərarı verib və Cəlaloğlunun namizədliyini irəli sürüb. Ancaq partiya bu qərara yenidən baxmaq niyyətindədir. Avqustun 1-də partiyanın Ali Məclisi keçiriləcək və partiya seçkidə iştirak edib-etməməklə bağlı yekun qərarını verəcək.
Cəlaloğlu bildirib ki, onun regionlarda seçkilərlə bağlı toplantılar keçirməsi prosesə tam hazır olmaq məqsədi daşıyır. "Ali Məclis bizim seçkidə iştirak qərarımızı qüvvədə saxlaya bilər. Belə olduqda biz seytnot vəziyyətə düşməmək üçün seçkiyə tam hazır olmalıyıq", - deyən Cəlaloğlunun sözlərinə görə, bölgələrdə partiyanın regional seçki qərargahları ilə tanış olacaq. Eyni zamanda, partiya fəalları ilə görüşərək, onlara müvafiq göstərişlər veriləcək.
Sağ təmayüllü partiya olan ADP 1991-ci ildə Cəlaloğlu tərəfindən təsis edilib. Partiya bu ilin yanvarınadək iqtidara qarşı radikal müxalif mövqedə olub. Yanvarda ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq keçmiş sədr Rəsul Quliyev və tərəfdarları ADP-dən imtina edərək özlərinin Açıq Cəmiyyət Pariyasını yaradıblar.
Məqalə müəllifi ilə əlaqə ünvanı: [email protected]
