Azərbaycan, Bakı, 07 iyul/ Trend , müxbir E.Babayev/ Müxalif "Azadlıq" blokunun bu ayın birinci yarısında keçirilməsi nəzərdə tutulan Məclisi baş tutmayacaq. "Sırf texniki problemlər səbəbindən, Məclisin keçirilməsi baş tutmur", - deyə bazar ertəsi Trend -a blokun üzvü, Vətəndaş və İnkişaf Partiyasının (VİP) sədri Əli Əliyev deyib.
Trend -un arayışı: Azərbaycanda prezident seçkisi oktyabrın 15- də keçiriləcək. "Azadlıq" blokunun Sədrlər Şurası seçkiqabağı mühitin qeyri-demokratik olduğunu və Seçki Məcəlləsinə dəyişikliklər edilərkən müxalifətin təkliflərininin nəzər alınmadğını bildirərək, seçkiləri boykot edəcəyi barədə bəyanat verib. Blokun Məclisində bu bəyanat müzakirəyə çıxarılıb, yekun qərar veriləcək. Blokun təsisçiləri Məclisin iclasının iyulun əvvəllərində keçiriləcəyini bildirmişdilər.
Əliyev hazırda Məclisin vaxtı ilə bağlı dəqiq tarix deməyin çətin olduğunu bildirib. "Burada hər hansı başqa subyektiv səbəb yoxdur. Blokun təsisçilərinin müəyyən işləri olduğundan, iclası keçirmək mümkün olmur. İstənilən halda biz Məclisin iclasını keçirəcəyik" - deyən VİP sədri blokun boykotla bağlı bəyanatının dəyişməsi ehtimalının az olduğunu da bildirib. "Hadisələr bu şəkildə davam edərsə, boykot qərarı dəyişməyəcək. Ölkədə seçkilərin qismən də olsa, demokratik keçiriləcəyi ehtimalı yoxdur" - deyə o əlavə edib.
"Azadlıq" blokunda üç müxalifət partiyası - Azərbaycan Xalq Cəbhəsi (AXCP), Liberal (ALP), Vətəndaş və İnkişaf (VİP) partiyaları təmsil olunur.
Məqalə müəllifi ilə əlaqə ünvanı: [email protected]