Azərbaycan, Bakı, 08 iyul/ Trend , müxbir R.Novruzov/ Azərbaycan və Rusiya arasında dövlət sərhədlərinin delimitasiyası üzrə razılıq hələ də əldə olunmayıb.
"Tərəflərin mövqeləri üst-üstə düşmür", - çərşənbə axşamı jurnalistlərə Rusiya səfiri Vasili İstratov deyib.
"Azərbaycan və Rusiya arasında dövlət sərhədlərinin delimitasiyası ilə bağlı məsələnin həll edilməsi üzrə danışıqlar davam edir. Lakin tərəflərin bu məsələdə mövqelərinin üst-üstə düşməməsi səbəbindən vəziyyət tam aydınlaşmayıb", - deyən diplomat problemin məğzini dəqiqləşdirməyib.
"Problemin həll edilməsi üçün bütün səylər göstərilir", - o əlavə edib.
Məsələyə hər iki tərəfin xarici işlər nazirləri müavinlərinin başçılıq etdiyi ekspertlərin iştirakı ilə işçi qrup səviyyəsində baxılır. İndiyədək Azərbaycan-Rusiya dövlət sərhədinin 5 faizini təşkil edən üç ərazi müəyyənləşdirilməyib. Onlardan biri Samur çayı üzərində olan körpü, digəri Xaçmaz rayonunun meşə zolağı massividir, sonuncu ərazi isə Azərbaycan, Gürcüstan və Rusiya sərhədinin kəsişdiyi Balakən rayonundadır.
