...

İran və Qərb şərtsiz müzakirələrə hazır deyil – ekspertlər

Siyasət Materials 14 İyul 2008 16:10 (UTC +04:00)

Azərbaycan, Bakı, 14 iyul / Trend , müxbir T.Cəfərov/ Hazırda İran və Qərb rəsmi Tehranın nüvə proqramı ilə əlaqədar müzakirələrə hazırlıq bildirsələr də, İranın şərtli müzakirəyə razı olmaması bu müzakirələrin nəticə verəcəyini şübhə altına salır. "Hazırda İran və Qərb şərtsiz müzakirələrə hazır deyil"- deyə, İran politoloqu Əhməd Şirzad Trend -a bildirib.

İranın Milli Təhlükəsizlik üzrə Ali Şurasının Baş katibi Səid Cəlili iyulun 19 - da Avropa Birliyinin xarici siyasət və təhlükəsizlik məsələləri üzrə Ali Komissarı Xavyer Solana ilə Cenevrədə görüşəcək və rəsmi Tehranın nüvə proqramı ilə əlaqədar müzakirə aparacaqlar. Solana iyunun 14 - də Qərbin İrana hazırladığı iqtisadi qüzəştlərlə bağlı təkliflər zərfini rəsmi Tehrana təhvil verib.

"İranın Qərbin təkliflər zərfinə verəcəyi cavab, əvvəlkindən fərqli olaraq, bir az yumşaq olacaq. Lakin İranın Qərbə güzəştə gedib - getməməsinə heç bir proqnoz vermək olmaz" - deyə nüvə məsələsi üzrə İran eksperti Əhməd Şirzad şənbə günü Tehrandan telefonla bildirib.

Onun sözlərinə görə, Qərb, əvvəlki kimi, müzakirələri yarımçıq dayandırmasa, danışıqlar davam edəcək:

"Müzakirələrin davam etməsi Qərbin İranla necə davranacağı və nə dərəcədə səbrli olacağına bağlıdır".

"Solana və Cəlilinin gələcək müzakirəsi keçmiş müzakirələrlə müqayisədə ümidvericidir. Lakin müzakirələrin davam etdirilməsi dünyanın və İranın daxili vəziyyətinə bağlıdır" - deyə Nüvə məsələsi üzrə İranlı ekspert Şirzad bidirib.

Onun sözlərinə görə, İranın daxili prosesləri də müzakirələrə təsir göstərir, İranın hazırki prezidenti prezidentliyinin sonlarında daha yumşaq addımlar atarsa, ola bilər ki, müzakirələr yaxşı nəticələnsin.

O əlavə edib ki, rəsmi mənbələrə görə, hazırda İranın nüvə stansiyalarında 3 min sentrifuqa quraşdırılıb, bunlara UF6 qaz aşılanıb və İran 4- 5 faizədək uran zənginləşdirə bilir.

"İran indiki şəraitdə Qərbin ortaya qoyduğu şərtləri qəbul etməyəcək, İran Qərbin tətbiq edəcəyi təzyiqlərin hansı dərəcədə və necə olduğunu gözləyir" - deyə Fransada fəaliyyət göstərən İranlı ekspert Hüseyn Lacevərdi Trend -a bildirib .

Onun sözlərinə görə, 1988 -ci ildə İran Bağdad-Tehran müharibəsində BMT- nin 598 saylı Qətnaməsini qəbul etdiyi kimi , indi də, nəhayət ki, beynəlxalq ictimaiyyətin tələblərinə müsbət cavab verəcək. Lakin hazırda rəsmi Tehran Qərbə müsbət cavab verməz."

"Cəlili və Solananın görüşü İrana vaxt qazandırır, lakin iyulun əvvəlindən Fransa prezidenti Nikolya Sarkozinin Avropa Birliyinin başçısı seçilməsi və onun İranın nüvə proqramına qarşı ciddi və qəti mövqeyini nəzərə alsaq, Qərbin İranla şərtsiz müzakirə edəcəyi gözlənilmir" - deyə İran Tədqiqatçılar Assosiasyasının sədri Lacəvərdi bu gün Parisdən telefonla bildirib.

Onun sözlərinə görə, Qərbin İranla şərtsiz müzakirəsi yanlız ABŞ-da prezident seçkilərindən sonra ola bilər, hazırda bu, ehtimal olunmur.

Cəlili iyulun 4 - də Avropa Birliyinin xarici siyasət və təhlükəsizlik məsələləri üzrə Ali Komissarı Solana ilə telefon danışığı aparıb. Cəlilinin sözlərinə görə, Solana ilə söhbətində İranın "əhatəli, konstruktiv və ortaq yanaşmalar əsasında müəyyənləşdirilmiş" mövqeyini onun diqqətinə çatdırıb. Hər iki tərəf müzakirələrin iyulun 19- da aparılması haqda razılığa iyulun 4 - də apardıqları telefon danışığında razılığa gəlmişdilər.

"İran İslam Respublikası iyulun 19 - da 5+1 qrupu ilə keçirəcəyi müzakirələrin başlanması üçün heç bir şərti qəbul etməyib" - deyə İranın hökumət sözçüsü Qulamhüseyn İlham iyulun 12 - də Tehranda keçirdiyi mətbuat konfransında bildirib.

O əlavə edib ki, İran bu müzakirələrdə heç bir şərti qəbul etməyib və şərtdən söhbət gedirsə, o şərt İran tərəfindən irəli sürüləcək.

Müəlliflə əlaqə saxlamaq üçün elektron ünvan [email protected]

Xəbər lenti

Xəbər lenti