Azərbaycan, Bakı, 17 iyul/ Trend , müxbir C.Babayeva/ Azərbaycanda fəaliyyət göstərən Seçki Monitorinq Mərkəzi (SMM) prezident seçkisilə bağlı fəaliyyət proqramını açıqlayıb. Proqrama əsasən, SMM vətəndaşlara seçici siyahılarının dəqiqləşdirilməsi qaydalarının öyrədilməsi, tərəfsiz və fərdi seçici müşahidəçiliyi üzrə vətəndaş qrupları və QHT-lərə hüquqi-texniki yardım olunması və seçici fəallığının artırılması üzrə tədbirləri həyata keçirəcək. Proqram barədə SMM-in icraçı direktoru Anar Məmmədli cümə axşamı Bakıda keçirdiyi mətbuat konfransında məlumat verib.
Trend -un arayışı: SMM qeyri-hökumət təşkilatıdır. 2001-ci ildə yaradılıb, bu ilin fevralında Ədliyyə Nazirliyi tərəfindən dövlət qeydiyyatına alınıb. 17 aprel 2008-ci ildə Ədliyyə Nazirliyinin Xətai rayon məhkəməsinə SMM-in qeydiyyatının etibarsız sayılması və ləğvi barədə irəli sürdüyü iddiası təmin olunub. SMM Apellyasiya Məhkəməsinə müraciət edib. Eyni zamanda iyulun 10-da SMM yenidən təsis olunub və bu barədə bildiriş Ədliyyə Nazirliyinə təqdim olunub. Hazırda SMM təşəbbüs qrupu kimi fəaliyyət göstərir.
Məmmədlinin bildirdiyinə görə, SMM fəaliyyət proqramını ABŞ Beynəlxalq İnkişaf Agentliyi, ATƏT-in Bakı ofisi, Böyük Britaniya səfirliyi və ABŞ Milli Demokratiya İnstitutunun maddi-texniki dəstiəyi ilə reallaşdıracaq. "Proqram çərçivəsində həmçinin ATƏT-in Demokratik Təsisatlar və İnsan Hüquqları Bürosu, Avropa Şurası, Avropa Birliyi və Seçki Sistemləri üzrə Beynəlxalq Fondun (İFES) Azərbaycandakı nümayəndəlikləri ilə əməkdaşlıq ediləcək", - deyə Məmmədli qeyd edib.
SMM-in icraçı direktorunun sözlərinə görə, dövlət qeydiyyatının olmaması Mərkəzin fəaliyyətinə maneələr yaratmasına baxmayaraq, təşəbbüs qrupu kimi seçki prosesinə öz töhfəsini verəcək. "Mərkəz qeydiyyatsız fəaliyyət göstərməyin ciddi problemlər yaratmayacağına ümidvardır", - deyə Məmmədli qeyd edib.
Onun bildirdiyinə görə, iyulun 29-da SMM-in apellyasiya şikayətinə baxılacaq. "Ədliyyə Nazirliyi və Apellyasiya Məhkəməsinin SMM-in qeydiyyat məsələsinə ədalətli yanaşacağına ümid edirik", -deyə Məmmədli bildirib.
Trend -un arayışı: Azərbaycanda prezident seçkisinin oktyabrın 15-də keçirilməsi nəzərdə tutulur. İndiyə qədər Müsavat Partityasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Müasir Müsavat Partiyasının sədri Hafiz Hacıyevin namizədliyi təmsil olunduqları partiyalar tərəfindən irəli sürülüb. Bundan başqa, "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir. İqtidaryönlü Ana Vətən və Sosial Rifah partiyaları isə seçkidə İlham Əliyevin namizədliyini müdafiə etmək qərarı veriblər. Müxalif Vəhdət və Tərəqqi partiyaları da İlham Əliyevi müdafiə etmək barədə qərar verəcəklərini bildiriblər. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə bəyanat verib. Blokun Məclisində bu bəyanat müzakirəyə çıxarılıb, yekun qərar veriləcək.
Məqalə müəllifi ilə əlaqə saxlamaq üçün ünvan - [email protected]
