Azərbaycan, Bakı, 29 iyul/ Trend / Ankarada Türkiyənin vasitəçiliyi ilə Suriya və İsrail arasında dolayı danışıqların dördüncü mərhələsi başlayıb. İsrailin rəsmi nümayəndələri Suriya tərəfi ilə danışıqlar aparmaq üçün artıq Türkiyənin paytaxtına gəliblər. Bu barədə çərşənbə axşamı Əl -Cəzirə(Aljazeera) telekanalı məlumat verib.
Rəsmi Qüdsün nümayəndələrinin əvvəllər bəyan etdikləri kimi, İsrail tərəfi danışıqların hazırki mərhələsinə daha ciddi yanaşır və ümid edir ki, bu, Suriya ilə birbaşa danışıqlara gətirəcək.
İsrailin 1967- ci ildə işğal etdiyi Suriyanın Colan yüksəkliklərinin taleyi danışıqların diqqət mərkəzindədir. Rəsmi Dəməşq, əvvəllər olduğu kimi, Suriya torpaqlarının geri qaytarılmasını tələb edir. İsrail, öz növbəsində, Suriyadan İran, Fələstin Müqavimət Hərəkatı (HƏMAS) və Livanın "Hizbullah" hərəkatı ilə münasibətləri dayandırmağı tələb edir.
Türkiyənin vasitəçiliyi ilə dolayı danışıqların birinci mərhələsi mayın 21 - də keçirilib.Tərəflərin iyun- iyulda apardıqları danışıqlar da heç bir nəticə verməyib.
Suriya prezidenti Bəşər Əsəd iyulun 12- də Parisdə bildirib ki, Corc Buş administrasiyası Ağ Evi tərk edənədək birbaşa danışıqlar başlaya bilməz.
Müəlliflə əlaqə saxlamaq üçün elektron ünvan - [email protected]
