Bakı. Trend:
Azərbaycan bu il Qazaxıstanın ən çox buğda ixrac etdiyi üçüncü ölkədir.
“Kazinform” agentliyinin məlumatına görə, bu barədə Qazaxıstan Kənd Təsərrüfatı Nazirliyinin Ümumdünya Çörək Günü münasibətilə yaydığı məlumatda qeyd edilib.
Bildirilib ki, Qazaxıstanın ümumu buğda ixracında Azərbaycanın payı 8 faiz (652 min ton ) təşkil edir.
Məlumatda qeyd olunub ki, Qazaxıstan ümumilikdə 29 ölkəyə buğda ixrac edir və tədarükün dəyəri 1,6 milyard dollara çatır.
İxracın yarıdan çoxu Özbəkistanın payına düşür – 51 faiz (4,2 milyon ton). Sonrakı yerlərdə Tacikistan – 16 faiz (1,3 milyon ton), Azərbaycan – 8 faiz (652 min ton), Əfqanıstan – 6 faiz (496,3 min ton) və İtaliya – 5 faiz (418,7 min ton) qərarlaşıb. Digər alıcılar arasında Əlcəzair və Qırğızıstan da var.
Qeyd edək ki, Ümumdünya Çörək Günü 2006-cı ildə Beynəlxalq Çörəkçilər və Qənnadıçılar İttifaqının təşəbbüsü ilə təsis edilib. Bu tarix 1945-ci il oktyabrın 16-da yaradılmış BMT-nin Ərzaq və Kənd Təsərrüfatı Təşkilatının (FAO) təsis edilməsinin ildönümünə təsadüf edir.
