Azərbaycan, Bakı, 05 avqust / Trend , müxbir D.Xatınoğlu/ Əfqanıstan ordusu NATO qüvvələrinin təlimləri nəticəsində ölkənin təhlükəsizliyini müstəqil şəkildə qoruyacaq qədər güclənib.
"Avqustun sonunadək, Əfqanıstan ordusu paytaxtın və bəzi regionların təhlükəsizliyini müstəqil şəkildə qorumağa hazırlaşır və bu proses sürətlə digər regionları da əhatə edəcək" - deyə, Əfqanıstanın müdafiə nazirinin sözçüsü, general Məhəmməd Zahir Əzimi çərşənbə axşamı telefonla Kabildən Trend -a bildirib.
Britaniyadanəşr olunan Ekonomist qəzetinin avqustun 1 - də yaydığı məlumata əsasən, Əfqanıstanın milli ordusu xeyli güclənib. Qəzetin məlumatına görə, əfqan ordusu son vaxtlar cəsarətlə böyük əməliyyatlar həyata keçirib.
Əziminin sözlərinə əsasən, Əfqanıstan ordusu Kabilin nəzarətini tamamilə öz öhdəsinə götürüb, bu öhdəlik rəsmi şəkildə bu ay ərzində NATO qüvvələrindən əfqan ordusuna təhvil veriləcək.
Əzimi bildirib ki, əfqan ordusunun əsas problemi hava hərbi qüvvələri və təchizatın zəif olmasıdır. "Hələlik, bu sahədə , eləcə də ağır silah -sursatdan istifadə ilə bağlı müəyyən iş aparmalıyıq "- deyə, o, əlavə edib.
Keçən il Müdafiə Nazirliyinin yaydığı rəsmi məlumata əsasən, milli ordunun yaradılmasına9.5 milyard dollar vəsait ayrılıb.
General Əziminin sözlərinə görə, hazırda Əfqanıstan ordusunda hərbi təlim görmüş 75 min nəfər xidmət edir və orduda xidmət edənlərin sayını 86 min nəfər çatdırmaq üzrə layihə hazırlamışıq və hələlik müzakirələr aparılır. Müdafiə nazirinin sözçüsü bildirib ki, NATO qüvvələri Əfqanıstanda yaxşı fəaliyyət göstərirlər, lakin əsas məsələ Əfqanıstanın milli ordusunun səmərəli fəaliyyətidir.
Əfqanıstanda inkişaf yalnız orduda müşahidə olunmur; hakimiyyət yoxsulluğu, idarələrdə maliyyə nöqsanlarını aradan qaldırmaq, narkotiklərlə mübarizə və digər sahələrdə böyük addımlar atır.
Əzimi əlavə edib ki, Əfqanıstanın cənubunda Pakistanın kəşfiyyat orqanı (İSİ) bəzən terrorçu qüvvələrə müxtəlif yardımlar göstərir və Əfqanıstanın təhlükəsizliyini pozmağa çalışır. Bu ciddi məsələ ilə bağlı Əfqanıstanın prezidenti Hamid Kərzai və ABŞ prezidenti rəsmən Pakistan rəsmilərini xəbərdarlıq ediblər.
Əfqan rəsmisi əlavə edib ki, avqustun sonunadək Kabil şəhərinin təhlükəsizliyi tamamilə Milli Orduya həvalə olunacaq.
Məqalə müəllifi ilə əlaqə saxlamaq üçün elektron ünvan [email protected]