Azərbaycan, Bakı, 02 oktyabr / Trend , müxbir N.Abdullayeva/ Norveçin Xarici İşlər Nazirliyi Azərbaycanda seçkiqabağı siyasi vəziyyəti öyrənir. Norveçin xarici işlər nazirinin müavini Raymond Yohansen bu məqsədlə Bakıda ölkənin rəsmi şəxsləri və siyasi partiya liderləri ilə görüşlər keçirir. Bu barədə cümə axşamı Trend -a Norveçin Azərbaycandakı səfirliyindən məlumat verilib.
Yohansen oktyabrın 15-nə təyin edilən prezident seçkisini boykot edən Azərbaycanın altı siyasi partiyasının nümayəndələri ilə görüşüb.
Azərbaycanda prezident seçkisi oktyabrın 15-də keçiriləcək. Sentyabrın əvvəlində "Azadlıq" blokuna daxil olan partiyalar - Xalq Cəbhəsi, Liberal Partiya, Vətəndaş və İnkişaf partiyası və Müsavat Partiyası və "Azərbaycan Naminə" İctimai Forum qarşıdan gələn prezident seçkisini qanunsuz tanımaq barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri-legitim elan edilib.
Prezident seçkisində yeddi namizəd - Yeni Azərbaycan Partiyasının (YAP) sədri, hazırki dövlət rəhbəri İlham Əliyev, müxalif Ümid Pariyasının sədri İqbal Ağazadə, Böyük Quruluş Partiyasının sədri Fazil Qəzənfəroğlu, Bütöv Azərbaycan Xalq Cəbhəsi Partiyasının sədri Qüdrət Həsənquliyev, Müasir Müsavat Partiyasının sədri Hafiz Hacıyev, Azərbaycan Liberal Demokrat Partiyasının sədri Fuad Əliyev və müstəqil namizəd Qulamhüseyn Əlibəyli iştirak edəcək.
Vətəndaş və İnkişaf Partiyasının sədri, "Azadlıq" blokunun həmsədri Əli Əliyev Trend -a bildirib ki, görüşdə Yohansen Azərbaycandakı seçkiqabağı vəziyyət və blokun qərarı barədə məlumatlandırılıb.
Norveçin xarici işlər nazirinin müavini Azərbaycanın xarici işlər naziri Elmar Məmmədyarov və Azərbaycanın xarici işlər nazirinin müavini Hafiz Paşayevlə görüşməyi planlaşdırır.
Norveç XİN rəhbəri müavininin Azərbaycana səfəri onun Cənubi Qafqaza turnesi çərçivəsində həyata keçirilir.
Məqalə müəllifi ilə əlaqə ünvanı: trend
