İran, Tehran, 28 oktyabr / Trend , müxbir A. Namdari, T. Cəfərov/ Amerikanın İrana qarşı həyata keçirdiyi sanksiyaların xarakteri və həyata keçirilmə prosesi göstərir ki, bu sanksiyalar İran İslam İnqilabçıları Korpusu Keşikçilərinin (Sepah) nəzarəti altında olan şirkətlərə qarşı yönəlib.
"Amerikanın İrana qarşı həyata keçirdiyi sanksiyalar, ilkin mərhələdə Sepahın ölkədən kənarda fəaliyyət göstərən Qüds qanadına, Sepah Korpusunun nəzarəti altında İranın nüvə sahəsində çalışan bəzi şirkətlərə qarşı olsa da, yeni sanksiyalar bütövlükdə İranın Sepah Korpusuna qarşı yönəlib", - deyə İran Araşadırmaçılar Assosiasiyasının (Association of İranian Researchers) sədri Hüseyn Lacevərdi Parisdən telefonla Trend - a bildirib.
Ötən həftə Amerika İranın İxracat İnkişafı Bankına və digər 13 xarici şirkətə qarşı yeni sanksiyalar tətbiq edib. Sanksiyalar bu şirkətlərin İran, Koreya və Suriyanın uranın zənginləşdirilməsi proqramını dəstəklədikləri üçün həyata keçirilib.
ABŞ İrana qarşı yeni sanksiyalar həyata keçirməkdə davam edir. Bunun əsas səbəbi uranın zənginləşdirilməsilə bağlı BMT Təhlükəsizlik Şurasının Qətnamələrinə İranın əməl etməməsidir.
Lacevərdi bildirib ki, Sepah Korpusu İranın silahlı qüvvələrinə daxil olan rəsmi qurumdur. BMT-nin üzvü olan İranın rəsmi bir qurumuna qarşı sanksiya tətbiq olunması, beynəlxalq hüquq baxımından bu ölkənin imicinə böyük zərbə vurur.
Amerika yeni sanksiyaları ötən həftə 5+1 qrupunun (Amerika, Böyük Britaniya, Fransa, Almaniya, Rusiya və Çin) İrana qarşı yeni sanksiyalar həyata keçirmək barədə razılığa gələ bilməməsindən sonra həyata keçirilib.
İrana qarşı həyata keçirilən davamlı sanksiyalar, bu ölkə və Qərb arasındakı siyasi gərginlik,İrana xarici sərmayə yatırılmasını riskli edir.
Ekspertlər bildirirlər ki, neft və qaz sənayesində ən müasir texnologiyalara malik olan Avropa və Amerika şirkətləri İranda fəaliyyət göstərmir və yeni layihələrdə iştirak etmirlər.
"Amerikanın İrana qarşı yeni sanksiyaları Rusiya və Amerika arasında siyasi gərginlik yaradıb. Çünki İranın Sepah Korpusu öz təchizatını, əsasən, Rusiya və onun müttəfiqlərindən alırdı" - deyə Lacevərdi bildirib
Onun fikrincə, Amerikanın BMT TŞ - nin Qətnamələrindən başqa yeni sanksiyalar həyata keçirməsi, Ağ Evin İrana qarşı qəti tədbirlər görmək niyyətindən xəbər verir.
ABŞ - ın ötən üç il ərzində İrana tətbiq etdiyi sanksiyalar göstərir ki, Ağ Ev beynəlxalq birlikdən İrana qarşı yeni sanksiyalar həyata keçirmək üçün dəstək ala bilmədikdə, özü birbaşa sanksiyaları həyata keçirməyə çalışır. Bu sanksiyaların həyata keçirilməsi prosesi göstərir ki, Ağ Ev, əsasən, İranın Sepah Korpusunun nəzarəti altında çalışan şirkət və banklara qarşı sanksiyalar tətbiq edib. İranın digər ticari - iqtisadi sahələrinə və başqa ölkələrlə əlaqələrinə isə, məhdudiyyətlər qoyulmayıb.
Sanksiyalar, əsasən, İranın nüvə fəaliyyətini məhdudlaşdırmaq, Sepah Korpusunun genişlənməsinin qarşısını almaq və İran rəsmilərini hədələmək məqsədi ilə həyata keçirilib.
Lacevərdi bildirib ki, Amerika prezidenti Corc Buş İran hökumətinə məktub ünvanlayıb. O əlavə edib ki, məktubun göndərilməsi haqda dəqiq məlumat olmasa da, belə görünür ki, Amerikanın oktyabrın 27- də Suriyaya hücumu İrana xəbərdarlıq idi.
Amerikanın son illərdə İran xalqına qarşı yumşaq davranmağa ( Amerikanın mənafeyini qoruyan ofisin Tehranda açılması ehtimalı, iranlılar və amerikalılar Şurasının ofisinin Tehranda açılmasına icazə verilməsi), İran rəsmiləri və hərbi qüvvələrinə qarşı sərt davranmağa çalışması isə, onu göstərir ki, bu ölkə İranın rəsmiləri ilə İran xalqı arasında fərq qoyur.
Məqalə müəllifi ilə əlaqə ünvanı: [email protected]