Azərbaycan, Bakı, 07 noyabr / Trend , müxbir İ.Əlizadə/ Azərbaycanın hakim Yeni Azərbaycan Partiyası (YAP) proporsional seçki sisteminin bərpa olunmasının tərəfdarıdır.
"Proporsional seçki sisteminin bərpa olunması və parlament seçkilərinin mojaritarla birlikdə qarışıq sistem üzrə keçirilməsi vacibdir", - cümə günü Trend -a YAP icra katibinin müavini, deputat Siyavuş Novruzov bildirib.
Trend -un arayışı: Azərbaycanda 2002-ci ilədək parlament seçkiləri zamanı həm proporsional (partiya siyahısı), həm də mojaritar (təkmandatlı) seçki sistemindən istifadə olunub. Həmin il Konstitusiya islahatı üzrə referendum keçirilib və proporsional sistem ləğv olunub.
Parlamentin Aqrar siyasət daimi komissiyasının sədri, hakim partiyanın Siyasi Şurasının üzvü Eldar İbrahimov da cümə günü Trend -a deyib ki, proporsional seçki sisteminin bərpa olunmasına ehtiyac var. Onun fikrincə, həm proporsional, həm də mojaritarla birlikdə qarışıq sitsemin tətbiq olunması vacibdir.
"Parlament deputatlarının 50 faizi proporsional, 50 faizi isə mojaritar sistemlə seçilməlidir. Mən vaxtilə proporsional seçki sisteminin ləğv olunmasını dəstəkləmişəm. Amma indi proporsional seçki sisteminin bərpa olunması zamanın tələbidir. Bizim qonşu ölkələr də ən azı 50/50 olmaqla qarışıq sistemdən istifadə edirlər", - deyə o vurğulayıb.
Azərbaycanın müxalif Xalq Cəbhəsi Partiyasının (AXCP) sədr müavini Həsən Kərimov cümə günü Trend -a bildirib ki, proporsional seçki sistemi bərpa olunmalıdır. Çünki proporsional seçki sistemi partiyaların gücünü və cəmiyyətin ona inamını göstərən əsas vasitədir. AXCP-nin seçki qanunvericiliyinin təkmilləşdirilməsi üçün apardığı mübarizədə əsas yerlərdən birini də proporsional seçki sisteminin bərpası tutur.
"Hakim partiyanın buna tərəfdar olmasını təqdirəlayiq hal hesab edirik. Bələdiyyə seçkiləri zamanı bu məsələni referenduma çıxarıb həll etmək olar", - Kərimov əlavə edib.
Məqalə müəllifi ilə əlaqə ünvanı: [email protected]
