Azərbaycan, Bakı, 24 noyabr/ Trend , müxbir A.Hüseynbala/ Azərbaycanın müxalif partiyalarının birləşdiyi Demokratiya Uğrunda İttifaqa (DUİ) daha bir partiya qəbul olunub.
"Demokratiya Uğrunda İttifaqın Sədrlər Şurasının iclasında Xalq Partiyasının quruma daxil olması ilə bağlı müraciətinə müsbət cavab verilib", - bazar ertəsi Trend -a DUİ-də təmsil olunan Azadlıq Partiyasının sədri Əhməd Oruc bildirib.
Trend -ın arayışı: Ötən il Demokratiya Uğrunda İttifaqı müxalifətçi Klassik Xalq Cəbhəsi, Azadlıq, Milli Demokratiya partiyaları yaradıblar. Sonradan Böyük Azərbaycan Partiyası sentyabrın əvvəlində quruma üzv olub. İttifaq bu partiyaların məşvərət və əməkdaşlıq qurumudur.
Onun sözlərinə görə, Xalq Partiyasının DUİ-nin Sədrlər Şurasındakı təmsilçisi, partiyanın sədri, Müsavat deputat qrupunun üzvü Pənah Hüseyn olacaq: "İttifaqa üzv olmaq üçün bir neçə partiya da müraciət edib. Sədrlər Şurasının növbəti iclaslarında həmin partiyaların qəbul olunub-olunmaması məsələsi müzakirə ediləcək", - Oruc deyib.
Azadlıq Partiyasının fikrincə, DUİ-nin gələcəkdə seçki blokuna çevrilməsi də istisna olunmur: "Məqsədimiz müxalif partiyaların hakimiyyətə iddialı ciddi bir mərkəzinin yaradılmasına nail olmaqdır. Bələdiyyə və parlament seçkilərində birgə iştirak məsələsi isə mütləq müzakirə ediləcək", - Oruc vurğulayıb.
"Cəmiyyəti narahat edən bir sıra problemlərin həlli müxalifətin birgə mübarizəsini tələb etdiyindən, biz ittifaqa üzv olmağı qərara almışdıq", - bazar ertəsi Trend -a Xalq Partiyasının (XP) sədri Pənah Hüseyn bildirib.
Onun sözlərinə görə, XP-nin Siyasi Şurasının noyabrın 16-da keçirilən iclasında DUİ-yə üzv olunmaq üçün qərar qəbul olunub: "Məqsədimiz demokratik qüvvələrin daha geniş tərkibdə əməkdaşlığına nail olmaqdır. DUİ ilə yanaşı Müxalifətin Əməkdaşlıq Mərkəzində təmsil olunan, eləcə də ADP və AMİP kimi siyasi qüvvələrin bir araya gələrək seçki məsələlərində əməkdaşlıq etməsi çox zəruridir", - Hüseyn qeyd edib.
Müxalif partiyanın sədri DUİ-nin gələcəkdə seçki blokuna çevrilməsini də istisna etmir.
Məqalə müəllifi ilə əlaqə ünvanı: [email protected]
