Azərbaycan, Bakı, 28 noyabr/ Trend , müxbir N.Abdullayeva/ Polşa Azərbaycanın Avro-Atlantik strukturlara inteqrasiya etmək səylərini dəstəkləyir.
Polşa və İsveç mayın 26-da Aİ xarici işlər nazirlərinə şərq qonşuları üçün vahid forumun - "Şərq tərəfdaşlığı"nın yaradılması haqqında təklif təqdim ediblər. Bura Aİ-nin 27 dövləti, həmçinin Ukrayna, Moldova, Gürcüstan, Ermənistan və Azərbaycan daxil olacaq.
"Avropa strukturlarına inteqrasiya - Azərbaycanın xarici siyasətinin vacib istiqamətidir və Varşava bu məsələdə Bakıya yardım göstərməyə hazırdır", - Polşanın Azərbaycandakı səfiri Kşiştov Krayevski cümə günü Trend -a bildirib.
""Şərq tərəfdaşlığı" Azərbaycan üçün Avropaya fəal inteqrasiya etməkdə stimul olacaq", - Avropa Komissiyasının Bakıdakı nümayəndəliyinin rəhbəri Alan Vaddams əvvəllər bildirib. Avropa Komissiyası "Şərq tərəfdaşlığı" üzrə yeni bölmə formalaşdırıb və dekabrda Brüsseldə keçirilməsi nəzərdə tutulan ilk görüşdə "Şərq tərəfdaşlığı"na üzv ölkələrin Avropaya inteqrasiya prosesində uğurları müzakirə etmək planlaşdırılır, həmçinin əsas inteqrasiya yolları müəyyən ediləcək.
Təşkilat çərçivəsində vizaların ləğvi, azad ticarət zonalarının tətbiqi, strateji sazişlərin imzalanması üzrə danışıqlar keçiriləcək.
Müəlliflə əlaqə saxlamaq üçün elektron ünvan: [email protected]
