Azərbaycan, Bakı, 17 dekabr / Trend , müxbir İ.Əlizadə/ Avropa Şurası Parlament Assambleyasının (AŞPA) vitse-prezidenti qurumun Qətnamələrini yerinə yetirməyən Ermənisana qarşı sərt tədbirlər görməyə çağırıb.
"Ermənistan AŞPA-nın qəbul etdiyi Qətnamələri yerinə yetirmir",- bu barədə çərşənbə günü Trend -a AŞPA -nın vitse- prezidenti, Azərbaycanın qurumda nümayəndə heyətinin rəhbəri Səməd Seyidov bildirib.
Trend - un arayışı: 2008 - ci ilin fevralın 19 - da Ermənistanda prezident seçkisi keçirilib. Mərkəzi Seçki Komissiyasının son məlumatlarına görə, hakimiyyətin namizədi, həmin dövrdə Baş nazir olan Serj Sərkisyan seçkidə 52 faizdən çox səs toplayaraq qalib gəlib. Müxalifətdən olan prezidentliyə namizəd Levon Ter-Petrosyan seçkinin saxtalaşdırıldığını bəyan edib. Ter-Petrosyanın tərəfdarları buna etiraz olaraq, bir necə gün etiraz aksiyaları keçiriblər.
Martın birindən ikisinə keçən gecə Ermənistan polisi müxalifətin mitinqini dağıdanda qarşıdurma yaranıb. Qarşıdurma zamanı 131 nəfər zərər çəkib, onlardan səkkizi güllə yarasından ölüb.
AŞPA Ermənistanla bağlı 1609 və 1620 saylı Qətnamələr qəbul edib. Qətnamələrdə siyasi məhbusların azadlığa buraxılması, baş verən hadisələrin obyektiv araşdırılması, dinc aksiya iştirakçılarına qarşı əsas olmadan güc tətbiq edən hüquq -mühafizə orqanları əməkdaşlarının cəzalandırılması və digər məsələlər əks olunub.
Ermənistandakı vəziyyət AŞPA Monitorinq Komitəsinin çərşənbə günü Parisdə keçirilən iclasında müzakirə olunacaq.
Seyidov hesab edir ki, AŞPA - da Emənistanla bağlı müzakirələr çox ciddi keçəcək:
"Çünki Ermənistan açıq şəkildə AŞPA Qətnamələrini yerinə yetirməkdən imtina edir. Eyni zamanda, bu ölkədə mövcud olan vəziyyət və baş verən proseslər AŞPA Qətnamələrinin yerinə yetirilməsinə imkan vermir. AŞPA Ermənistanda siyasi məhbuslar problemini xüsusilə müzakirə edəcək".
Onun fikrincə, Ermənistana qarşı hansı tədbirlərin görüləcəyi Monitorinq Komitəsinin və AŞPA-nın yanvar sessiyasındakı müzakirələrdən sonra məlum olacaq.
"AŞPA - da bəzi dairələrin köməyi ilə Ermənistana xüsusi münasibət var və bu ölkə qorunub -saxlanılır. Amma ölkə ilə bağlı faktlar hazırda o qədər ciddidir ki, bunu gizlətmək mümkün deyil. Artıq AŞPA -nın üçüncü sessiyasıdır ki, Ermənistanla bağlı məsələ müzakirə olunur", -deyə vitse-prezident əlavə edib.
Məqalə müəllifi ilə əlaqə saxlamaq üçün ünvan: [email protected]