Azərbaycan İran və Türkmənistan ilə Xəzərin bölüşdürülməsinə dair məsələni qismən razılaşdırıb
Qazaxıstan, Astana, 24 dekabr/ Trend müxbir K. Konırova/ "İran və Türkmənistan ilə Xəzərin bölüşdürülməsinə dair məsələ qismən razılaşdırılıb", - deyə çərşənbə günü Azərbaycanın xarici işlər nazirinin müavini Xələf Xələfov, Trend -ın Astanadakı xüsusi müxbirinin sualına cavab verərkən bildirib.
"Biz İran və Türkmənistan ilə danışıqlar aparırıq. Və danışıqların əsas predmeti Xəzər dənizinin dibinin bölünməsi məsələsidir", - deyə Xələfov bildirib.
Onun sözlərinə görə, "danışıqlar prosesində irəliləyişlər var", lakin nazir müavini onların konkret hansı məqamlar üzrə olduğunu açıqlamayıb və bildirib ki, bu irəliləyişlər olduqca səciyyəvidir və dar mütəxəssis və ekspert sahəsidir.
"Biz bütün məsələlərin tezliklə razılaşdırılması üçün danışıqların ritmini tutmağa çalışırıq. Məsələlər qismən razılaşdırılıb və danışıqları davam etdiririk", - deyə Xələfov vurğulayıb.
Onun sözlərinə görə, bütün tərəflər bu məsələnin həllində maraqlıdır.
Xələfov Xəzər dənizinin bölüşdürülməsi üzrə danışıqlar prosesinin nə zaman başa çatacağı sualına cavab verməkdə çətinlik çəkib.
"Danışıqların nə zaman başa çatacağını söyləmək çətindir, çünki, bir çox aspektlər detallı müzakirə tələb edir. Lakin bunda bütün tərəflər maraqlıdır və onlar razılığa gəlməyə çalışacaqlar", - deyə Xələfov bildirib.
Məqalə müəllifi ilə əlaqə ünvanı
