Azərbaycan, Bakı, 27 dekabr/ Trend , müxbir N.İsmayılova/ "Bank of Baku 2009 - cu ilin əvvəlində Avropa Yenidənqurma və İnkişaf Bankından (AYİB) yeni kredit xətlərinin cəlb edilməsi məsələsini nəzərdən keçirəcək", - bankın İdarə Heyətinin sədri Cəlal Qasımov bildirib.
"Avropa Bankından yeni kredit xətlərinin cəlb edilməsi məsələsini 2009 - cu ilin birinci rübündə müzakirə etmək planlaşdırılır, - Qasımov vurğulayıb. - Biz AYİB - lə bir neçə istiqamət - kiçik və orta biznesin kreditləşdirilməsi üzrə işləyirik. Bank of Baku qısa müddətdə kiçik və orta sahibkarlığın, mikrokreditləşdirmənin maliyyələşdirilməsinə ayrılmış kredit xətlərindən istifadə edib".
Bank Azərbaycanda ilk dəfə olaraq, AYİB - lə birgə həmmaliyyələşdirmə proqramı çərçivəsində, bir neçə layihəni maliyyələşdirib.
2006 - cı ilin dekabrında Avropa Bankı və Bank of Baku bankın böyük korporativ müştərilərinin layihələrini birgə maliyyələşdirmək üçün beş milyon dollar məbləğində saziş bağlayıblar. Bu proqram üzrə risklər bərabər əsasda paylanır.
"AYİB - lə əməkdaşlıq Bank of Baku-ya Azərbaycan iqtisadiyyatının kreditləşdirməsini genişləndirməyə, əməkdaşların ixtisasını artırmağa imkan verib və bankın reputasiyasına müsbət təsir göstərib", - Qasımov bildirib.
2007 - ci ildə Bank of Baku Avropa Bankından mikro, kiçik və orta sahibkarlığın inkişafına üç milyon dollar məbləğində kredit xətti alıb. Bu məbləğin iki milyon dollarını AYİB, qalan vəsaitləri Çinin Beynəlxalq Əməkdaşlıq və İnkişaf Fondu (TAİPEİ) təqdim edib.
Bank of Baku bu kredit xətti ilə yanaşı, AYİB - in ortamüddətli kreditləşdirmə proqramı çərçivəsində, 6,25 mln. dollar sindikatlaşdırılmış maliyyələşdirmə alıb.
Bank of Baku iki yerli bankın birləşməsi nəticəsində 2005 - ci ildə yaradılıb. AYİB 2005 - ci ildən Azərbaycanın bu bankının səhmdarlığına daxil olub.
Dekabrın 27- nə olan cari mübadilə məzənnəsi -- 0,8011 AZN/USD.
Müəlliflə əlaqə saxlamaq üçün elektron ünvan: [email protected]