Azərbaycan, Bakı, 19 yanvar / Trend , müxbir A.Hüseynbala/ Azərbaycanın müxalif Milli İstiqlal partiyasının referendumla bağlı yaratdığı təşviqat qrupu təsis olunub.
"Yanvarın 17-də ilkin təşəbbüs qruplarının iclasları başa çatıb. Bu gün isə "Milli İstiqlal" təşviqat qrupunun təsis yığıncağı keçirilib", - bazar ertəsi Trend -a Azərbaycan Milli İstiqlal Partiyasının (AMİP) mətbuat və təbliğat katibi Əli Orucov bildirib.
Trend -un arayışı: Azərbaycanın hakim partiyası "Yeni Azərbaycan", müxalif Müsavat Partiyası "Respublikaçılar" referendum üzrə təşəbbüs qrupları yaradıblar. YAP-ın təşəbbüs qrupu yanvarın 14-də imza vərəqələrini qeydə alınmaq üçün Mərkəzi Seçki Komissiyasına təqdim edib.
Bundan əlavə, "Azadlıq" blokuna daxil olan Xalq Cəbhəsi, Milli Birlik Hərəkatı, Vətəndaş və İnkişaf partiyaları, o cümlədən "Azərbaycan Naminə" İctimai Birlik, Demokrat Partiyası və bir sıra qeyri-hökumət təşkilatları "Qarabağ və Respublika Uğrunda Vətəndaş Hərəkatı", Klassik Xalq Cəbhəsi, Azadlıq, Milli Demokrat, Böyük Azərbaycan və Xalq patiyalarının təmsil olunduğu Demokratiya Uğrunda İttifaq "Azərbaycan Xalq Cümhuriyyəti", Azərbaycan Milli İstiqlal Partiyası isə "Milli İstiqlal" təşəbbüs qrupunun yaradılması barədə qərar verib.
Hakim partiyanın icra katibinin müavini Mübariz Qurbanlı daha öncə Trend -a bildirib ki, müxalifət partiyalarının referendum əleyhinə yaratdıqları təşəbbüs qrupları effektsiz olacaq.
Azərbaycan parlamenti ötən ayın sonunda keçirilən iclasında Konstitusiyaya əlavələr və dəyişikliklər edilməsi ilə bağlı referendumun martın 18-də keçirilməsi barədə qərar qəbul edib.
Konstitusiyanın 29-cu maddəsinə dəyişiklik edilməsinə dair referendumun keçirilməsi barədə qərar verilib.
Azərbaycan Respublikası Konstitusiyasının mətninə dəyişikliklər yalnız referendum vasitəsilə daxil edilə bilər (maddə 152). AR Konstitusiyasının mətninə dəyişikliklər Milli Məclis və ya prezident tərəfindən təklif edilirsə, o zaman təklif edilən dəyişikliklər üzrə əvvəlcədən AR Konstitusiya Məhkəməsinin qərarı alınmalıdır (maddə 153).
Orucovun sözlərinə görə, təşviqat qrupunun qeydiyyata alınması üçün sənədlər Mərkəzi Seçki Komissiyasına iki gün ərzində təqdim ediləcək.
AMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Etibar Məmmədov 2004-cü ilin sonunda partiyanın sədrliyindən istefa verdikdən sonra partiya daxilində parçalanma baş verib. Ondan sonra AMİP-in sədri olan Əli Quliyevə qarşı partiya daxilində anrazılıq yarandığı zaman partiya üzvlərinin bir qismi AMİP-dən gediblər.
Etibar Məmmədov hazırda Beynəlxalq Demokrat İttifaqının (BDİ) sədr müavinidir.
Məqalə müəllifi ilə əlaqə ünvanı: [email protected]