Azərbaycan, Bakı, 16 fevral / Trend , müxbir A.Hüseynbala/ Azərbaycanın müxalifət partiyası Seçki Məcəlləsinə dəyişikliklərlə bağlı təkliflərini hazırlayıb.
"Həmin təkliflərin bir hissəsi Avropa Şurasının Venesiya Komissiyasına təqdim oluna bilər. Amma biz düşünürük ki, komissiya Azərbaycan iqtidarı və müxalifətin irəli sürdüyü təkliflərə əsasən yox, ümumbəşəri prinsiplərə uyğun mövqe bildirməlidir", - bazar ertəsi Trend -a Müsavat Partiyası Mərkəzi İcra Aparatının rəhbəri Arif Hacılı bildirib.
Trend -un arayışı: Avropa Şurası Venesiya Komissiyasının katibi Sergey Kuznetsov ötən həftə Trend -a deyib ki, Azərbaycan hökuməti və müxalifət partiyalarının ölkənin Seçki Məcəlləsinə dəyişikliklər edilməsi üzrə təkliflərini öz tövsiyələrində nəzərə almağa hazırdır.
Azərbaycan Milli Məclis Aparatının rəhbəri Səfa Mirzəyev də bir müddət əvvəl Trend -a bildirib ki, Azərbaycan hökuməti Seçki Məcəlləsinə yenidən əlavə və dəyişikliklər etmək üçün Venesiya Komissiyası ilə müzakirələrə başlayacaq.
2008-ci ilin iyununda Avropa Şurasının Venesiya Komissiyası ilə Azərbaycan hökuməti arasında birgə müzakirələrdən sonra Seçki Məcəlləsinə əlavə və dəyişikliklər edilib. Dəyişikliklərdə Azərbaycan müxalifətinin istədiyi kimi komissiyaların paritet əsasda formalaşdırılması məsələsi öz əksini tapmayıb. Seçki qanunvericiliyinə etiraz əlaməti olaraq, Azərbaycanın bir neçə müxalifət partiyası keçən il oktyabrın 15-də keçirilən prezident seçkilərində iştirak etməkdən imtina edib.
Hacılının sözlərinə görə, Venesiya Komissiyası bu məsələdə ləng hərəkət edir. "Buna baxmayaraq, biz həmin qurumla Seçki Məcəlləsinə dəyişikliklərlə bağlı əməkdaşlıq etməyə hazırıq", - Müsavat Partiyasının funksioneri əlavə edib.
Müsavat Partiyası 1911-ci ilin oktyabrında Bakıda yaradılıb. Müsavat Partiyasının (Bərpa) Qurultayı 1992-ci il noyabrın 7-də Bakıda Respublika sarayında keçirilib. Gizli səsvermənin yekunları əsasında Qəmbər əksəriyyət səslə Müsavat Partiyasının başqanı seçilib.
Qəmbər Аzərbаycan pаrlаmеntinin еks-spikеri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Pаrtiyа 4 nəfər deputatla parlamentdə təmsil olunur.
"Ötən il keçirilən prezident seçkisi ərəfəsində həm "Azadlıq" blokunda təmsil olunan partiyaların, həm də bütövlükdə müxalifətin Seçki Məcəlləsinə əlavə və dəyişikliklərlə bağlı birgə təkliflər paketi Venesiya Komissiyasına təqdim edilib", - bazar ertəsi Trend -a "Azadlıq" blokunda təmsil olunan Azərbaycan Xalq Cəbhəsi Partiyasının (AXCP) sədr müavini Həsən Kərimov bildirib.
Kərimovun sözlərinə görə, komissiyanın nümayəndələri dəfələrlə bildiriblər ki, Azərbaycan hakimiyyət orqanları ilə Seçki Məcəlləsi müzakirə edilən zaman müxalifətin də təklifləri nəzərə alınacaq: "Çox təəssüf ki, seçki qanunvericiliyinə əlavə və dəyişikliklər zamanı nəinki təkliflərimiz qəbul olunmadı, əksinə, geriyə doğru addım atıldı", - AXCP təmsilçisi qeyd edib.
Kərimov deyib ki, Venesiya Komissiyasının həmin təkilfləri yenidən nəzərə alacağına inanmırlar.
"Azadlıq" blokunda Azərbaycanın üç müxalifət - Xalq Cəbhəsi, Vətəndaş və İnkişaf, Liberal partiyaları birləşib.
Məqalə müəllifi ilə əlaqə ünvanı:[email protected]