Azərbaycan, Bakı, 02 mart / Trend , müxbir C.Babayeva / Azərbaycan Yaşıllar Partiyası (AYP) hökumətin dünya maliyyə böhranı ilə bağlı bir sıra ekoloji layihələrin həyata keçirilməsini təxirə salmasından narahatdır.
"Maliyyə böhranını səbəb gətirərək ekoloji layihələrin gələcəyə saxlanması ekoloji problemlərin nəticələrini dəfələrlə ağırlaşdıra bilər. Ekoloji fəsadların insanların səhhətinə edəcəyi təsiri isə heç bir vəsaitlə aradan qaldırmaq mümkün olmayacaq", - bazar ertəsi Trend -a Azərbaycan Yaşıllar Partiyasının (AYP) sədri Mais Güləliyev bildirib.
"Xarici neft şirkətlərinin Xəzər dənizinin fauna və florasına vurduğu ziyan həmin neft şirkətlərinin gəlirlərindən tutulan vəsait hesabına aradan qaldırılmalıdır", - o, deyib.
AYP sədrinin sözlərinə görə, ekoloji problemlərin həllini sonraya saxlamaq olmaz. Ekoloji problemlər təbəqəsindən, tutduğu vəzifədən asılı olmayaraq, hamını narahat etməlidir. Azərbaycanın ekoloji problemləri ona yaxın olan regionlara da təsir edir. Ona görə də ekoloji problemlərin aradan qaldırılması üçün hamı səy göstərməlidir", - Güləliyev deyib.
Güləliyev deyib ki, Yaşıllar Partiyası yalnız ekoloji problemləri araşdırıb ictimaiyyətə və dövlət orqanlarına çatdırır.
Məqalə müəllifi ilə əlaqə ünvanı: [email protected]
