Azərbaycan, Bakı, 13 aprel / Trend , müxbir Ü.Sadıxova /
"HƏMAS-ın Fələstin Administrasiyası ilə İsrail arasında aparılan danışıqlara müqavimət göstərməsinə baxmayaraq, bu, Fələstin partiyalarının milli dialoquna mane olmayacaq", - FƏTH-in HƏMAS-la danışıqlar üzrə nümayəndəsi Nabil Şaat deyib.
Parlament qrupuna başçılıq edən HƏMAS-ın nümayəndəsi Salah Bardvil Fələstin Administrasiyasının başçısı Mahmud Abbasın İsrailin Baş naziri Netanyahu ilə bazar günü baştutan telefon danışığını tənqid edib. Məlumatı Al Jazeera saytı yayıb.
HƏMAS təmsilçisi bu addımı FƏTH-lə HƏMAS-ın Fələstin milli hökumətinin yaradılması istiqamətində apardığı danışıqlara zərbə kimi dəyərləndirib.
"HƏMAS-ın narazılığı açıq bəyanatdır. Buna baxmayaraq HƏMAS-ın mövqeyi Qahirədə aparılan dialoqun bitməsinə təsir etməyəcək", - telefon bağlantısı zamanı Qahirədən Şaat deyib.
Fələstin qruplaşmalarının dialoqu aprelin 26-da Qahirədə sona çatacaq və nəticədə milli hökumətin yaradılması proqramı qəbul ediləcək.
Düşmənçilik edən iki fələstin qruplaşması arasında danışıqlar martın əvvəlində Misirin vasitəçiliyi ilə bərpa olundu.
HƏMAS və FƏTH üzvləri arasında 2007-ci ildə Qəzzada baş vermiş silahlı toqquşmalardan sonra dialoqa son qoyulmuşdu.
FƏTH və HƏMAS arasında olan fikir ayrılıqları İsraillə bağlı sülh prosesi məsələsində daha da kəskinləşir. HƏMAS İsrailin mövcudolma hüququnu və sülh prosesinə dair bütün beynəlxalq razılaşmaları tanımır.
Əvvəlki hökumətdən fərqli olaraq İsrailin yeni hökumətinin başçısı Netanyahu müstəqil Fələstin hökumətinin yaranmasının əleyhinədir.
"Prezident Abbas açıq aydın mövqeyini ortaya qoyaraq bildirib ki, Netanyahu Fələstin hökumətinin hüquqlarını tanımayınca sülh danışıqları bərpa olunmayacaq", - Şaat qeyd edib.
Ayın əvvəlində İsrail XİN rəhbəri Annapolisdə Fələstin hökumətitnin yaradılması barədə razılaşmanı rədd edib.
Lakin Abbasla telefon danışığı zamanı Netanyahu sülhün bərqərar olması naminə danışıqları davam etdirmək niyyətində olduğunu bildirib.
Məqalə müəllifi ilə əlaqə ünvanı: [email protected]
