Azərbaycan, Bakı, 18 may / Trend , müxbir C.Babayeva /
Azərbaycanın müxalif Klassik Xalq Cəbhəsi Partiyası (KXCP) bələdiyyə seçkisində iştirak etmək barədə qərar verib.
"Partiya Ali Məclisinin iclasında bələdiyyə seçkisi ilə bağlı qəbul olunan qərarda seçkidə iştirakın vacibliyi vurğulanıb. Ölkədə seçkiöncəsi demokratik seçki şəraitinin yaradılması zəruri hesab olunub", - bazar ertəsi Trend -a KXCP sədri Mirmahmud Mirəlioğlu məlumat verib.
Azərbaycanda bələdiyyə seçkisinin bu ilin dekabrında keçirilməsi gözlənilir.
Bələdiyyə seçkisində iştirak formasına gəlincə, Mirəlioğlu bildirib ki, seçkiyə birlik halında qatılmağın tərəfdarıdır. "Partiyanın seçkidə iştirak formasının müəyyənləşdirilməsi səlahiyyətinin Ali Məclis tərəfindən İdarə Heyətinə verilməsi barədə qərar qəbul olunub", - o deyib.
Mirəlioğlu partiyanın təmsil olunduğu Demokratiya Uğrunda İttifaqın (DUİ) bələdiyyə seçksi öncəsi seçki blokuna çevrilməsini mümkün hesab edir. "Bu istiqamətdə perspektivlərin araşdırılması və işlərin görülməsi barədə qərarlar var. Həm bələdiyyə, həm də parlament seçkilərində bu məsələnin müsbət həllinə nail olunacağı gözlənilir", - KXCP sədri deyib.
O bildirib ki, Ali Məclisdə həmçinin partiyanın növbəti qurultayının keçirilməsi barədə də qərar qəbul olunub. "Qurultayın vaxtı şəhər və rayon təşkilatlarında konfransların keçirilməsindən sonra məlum olacaq. Qurultayı bələdiyyə seçkisinə qədər keçirməyə çalışacağıq", - Mirəlioğlu deyib.
Trend -un arayışı: 2006-cı ilin mart ayında müxalifətçi Klassik Xalq Cəbhəsi Partiyasının təsis qurultayı keçirilib. Həmin vaxta qədər partiya Azərbaycan Xalq Cəbhəsi Partiyası adına iddia edirdi və "Klassiklər" AXCP-si kimi tanınırdı. Azərbaycanın eks-prezidenti, AXCP-nin sədri Əbülfəz Elçibəyin müavini olmuş Mirmahmud Mirəlioğlu 2000-ci ildə partiyanın iki yerə parçalanmasından sonra "Klassiklər" qanadına sədrlik edib. 2006-cı ildə partiyanın adında dəyişiklik edilərək KXCP adlandırılıb.
Məqalə müəllifi ilə əlaqə ünvanı: [email protected]
