Azərbaycan, Bаkı, 25 may / Trend , A.Hüseynbala /
Azərbaycanın hakim partiyası seçki komissiyalarının yenidən formalaşdırılması ilə bağlı təklifləri əsassız hesab edir.
"İndi fəaliyyət göstərən komissiyalar paritet formada təşkil olunub və Azərbaycanda azad, ədalətli, demokratik və şffaf seçkilər keçirilməsi üçün kifayət qədər təcrübəyə malikdir", - bazar ertəsi Trend -a Yeni Azərbaycan Partiyası (YAP) icra katibinin müavini, millət vəkili Mübariz Qurbanlı bildirib.
Trend -un arayışı: Azərbaycanın bəzi müxalifət partiyaları bələdiyyə və parlament seçkiləri ərəfəsində seçki komissiyalarının tərkibinin yenidən formalaşdırılması ilə bağlı təkliflə çıxış edirlər.
Azərbaycanda bələdiyyə seçkisi 2009-cu ilin dekabr ayında, parlament seçkisi 2010 - cu ildə keçiriləcək. İndiyədək iki dəfə - 1999 və 2004-cü ildə bələdiyyə sеçkiləri kеçirilib.
2008-ci ilin iyununda Avropa Şurasının Venesiya Komissiyası ilə Azərbaycan hökuməti arasında birgə müzakirələrdən sonra Seçki Məcəlləsinə əlavə və dəyişikliklər edilib. Dəyişikliklərdə Azərbaycan müxalifətinin istədiyi kimi komissiyaların paritet əsasında formalaşdırılması öz əksini tapmayıb. Seçki qanunvericiliyinə etiraz əlaməti olaraq Azərbaycanın bir neçə müxalifət partiyası ötən il oktyabrın 15-də keçirilən prezident seçkilərində iştirak etməkdən imtina edib.
Qurbanlının sözlərinə görə, müxalifətin bələdiyyə seçkiləri ərəfəsində seçki komissiyalarının tərkibinin paritet qaydada formalaşdırılması ilə bağlı təklifləri nəzərə alına bilməz. "Həmin komissiyalarda kifayət qədər təcrübəli mütəxəssislər təmsil olunur. Ona görə komissiyaların tərkibinə yenidən baxılmasını məqsədəyuğun hesab etmirəm və bu cür təkliflərin hansı səbəbdən ortaya çıxdığı da mənə bəlli deyil", - hakim partiya funksioneri əlavə edib.
YAP 1992-ci ildə о vаxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 16 ildir hakim partiya olan YAP-ın indiki sədri prezident İlham Əliyevdir.
Məqalə müəllifi ilə əlaqə ünvanı:[email protected]
