Azərbaycan, Bakı, 21 avqust / Trend , müxbir C.Babayeva /
Müxalif Demokratiya Uğrunda İttifaqda (DUİ) təmsil olunan Azadlıq Partiyası hesab edir ki, bələdiyyə seçkisi ilə bağlı qurumda mövcud fikir ayrılıqları prinsipial deyil.
"İttifaqda təmsil olunan bütün partiyalar bələdiyyə seçkisində iştirakı zəruri hesab edir. Partiyaların seçkiyə ayrı-ayrılıqda və ya blok şəklində qatılması ilə bağlı fikir ayrılığı var ki, bu da prinsipial məsələ deyil", - cümə günü Trend -a Azadlıq Partiyasının sədri Əhməd Oruc bildirib.
Trend -un arayışı: Demokratiya Uğrunda İttifaq 2005-ci il parlament seçkisindən sonra yaradılıb. İttifaqda Klassik Xalq Cəbhəsi, Azadlıq, Milli Demokrat, Böyük Azərbaycan və Xalq partiyaları təmsil olunur.
Azərbaycanda bələdiyyə seçkisinin bu ilin dekabrında keçirilməsi nəzərdə tutulur.
Orucun sözlərinə görə, İttifaqın bələdiyyə seçkisi ilə bağlı müəyyən çətinlikləri var. "Çətinliyimiz yerlərdə üzvlərimizi və tərəfdarlarımızı seçkiyə səfərbər etməklə bağlıdır. Onlar bildirirlər ki, bələdiyyə seçkisi yerlərdə faktiki olaraq keçirilmir", - partiya sədri deyib.
O, İttifaqın bələdiyyə seçkisində blok şəklində iştirakının tərəfdarı olduğunu bildirib. "Seçki Məcəlləsi, seçki mühitinin demokratikləşdirilməsi ilə bağlı demokratik qüvvələrin bütün resurslarının əlaqələndirilməsi vacibdir", - Oruc deyib.
Məqalə müəllifi ilə əlaqə ünvanı: [email protected]
