Azərbaycan, Bakı, 01 oktyabr / Trend , müxbir A.Hüseynbala/
Azərbaycanın müxalif Ümid Partiyası heç bir şərt irəli sürmədən birliyin davam etdirilməsinin tərəfdarıdır.
"Bizim nə hərəkatdan çıxmaq, nə də Müsavatın təklıfini qəbul etmək fikrimiz yoxdur", - cümə axşamı Trend -a "Qarabağ və Respublika Uğrunda Hərəkat"da təmsil olunan Ümid Partiyası Ali Məclisinin sədri Ənvər Ağazadə bildirib.
Trend -un arayışı: "Qarabağ və Respublika Uğrunda Hərəkat"da təmsil olunan Müsavat Partiyası Ümid Partiyasının seçki komissiyalarındakı üzvlərinin geri çağırılmasını tələb edir. Ümid Partiyası isə Müsavat deputat qrupunun üzvlərinin mandatlarından imtina edəcəyi təqdirdə tələbin yerinə yetirələcəyini bəyan edib. Hər iki partiya arasında yaranan bu gərginlik hərəkat daxilində ciddi böhrana səbəb olub.
Ağazadənin sözlərinə görə, son günlər Müsavat və Ümid partiyaları arasında yaranan gərginlik bu partiyaların da təmsil olundugu "Qarabag və Respublika Ugrunda Hərəkat"ın parçalanacagını aktuallaşdırıb. "Bu gün komissiyalarda partiyamızı təmsil edən şəxslərin böyük əksəriyyəti fədakar insanlardır. Onlar saxta protokollara imza atmayıblar. Sözsüz ki, hamıdan eyni cür qəhrəmanlq gözləmək doğru deyil. Biz də o qədər ağılsız deyilik ki, uzun illər partiya sıralarında əziyyət çəkən, hər cür məhrumiyyətlərə, təqiblərə məruz qalan, partiyanın liderinə və rəhbərliyinə inanan insanlardan imtina edək. Ona görə də biz bu təklifi qeyri-səmimi və məntiqsiz hesab edirik. Əgər bu səbəbdən hərəkat dağılacaqsa, bunun məsuliyyəti Müsavat Partiyasının üzərində qalacaq", - Ali Məclis sədri əlavə edib.
"Ümid Partiyası hərəkatın dağılmayacağına əmin ola bilər", - cümə axşamı Trend -a "Qarabağ və Respublika Uğrunda Hərəkat"da təmsil olunan Müsavat Partiyası Mərkəzi İcra Aparatının rəhbəri Arif Hacılı bildirib.
Hacılının sözlərinə görə, hərəkatdan bəzi partiyalar çıxa, yaxud çıxarıla bilərlər. "Bu baş versə belə, hərəkat olduğu kimi qalacaq və fəaliyyətini davam etdirəcək", - o deyib.
"Qarabağ və Respublika Uğrunda Hərəkat"ı Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları 2009-cu il martın 18-də Konstitusiyaya təklif olunan əlavə və dəyişikliklərlə bağlı keçirilən referendum ərəfəsi təsis ediblər.
Məqalə müəllifi ilə əlaqə ünvanı: [email protected]
