Azərbaycan, Bakı, 14 oktyabr / Trend , müxbir A..Hüseynbala/
Azərbaycanın müxalifət partiyası təmsil olunduğu hərəkat daxilində yaranan böhranın həlli üçün sıfır variantını təklif edir.
"Referendum zamanı və may ayında bələdiyyə seçkiləri ilə bağlı qərar qəbul edərkən heç bir şərtin irəli sürülməməsinə indi də əməl olunmalıdır", - çərşənbə günü Trend -a "Qarabağ və Respublika Uğrunda Hərəkat"ın təsisçililərindən olan Ümid Partiyasının sədri, millət vəkili İqbal Ağazadə bildirib.
Trend -un arayışı: "Qarabağ və Respublika Uğrunda Hərəkat"da təmsil olunan Müsavat Partiyası Ümid Partiyasının seçki komissiyalarındakı üzvlərinin geri çağırılmasını tələb edir. Ümid Partiyası isə Müsavat deputat qrupunun üzvlərinin mandatlarından imtina edəcəyi təqdirdə tələbin yerinə yetirələcəyini bəyan edib. Hər iki partiya arasında yaranan bu gərginlik hərəkat daxilində ciddi böhrana səbəb olub.
Ağazadənin sözlərinə görə, müzakirələrin nəticəsində kompromiss əldə olunmasa, onun rəhbərlik etdiyi partiyanın hərəkatdan uzaqlaşmaq niyyəti yoxdur.
"Bizim seçki komissiyalarında təmsil olunan nümayəndələrimizin geri cağırılması ilə bağlı məsələni Müsavat Partiyası qaldırıb. Əgər təklif keçməzsə, onda bu partiya hərəkatda bizimlə bir yerdə olmadığını elan edib, gedə bilər", - partiya sədri əlavə edib.
Müxalifətin əvvəllər yaranan birliklərinin də bəzilərinin dağılmasında Müsavat Partiyasının rolu olmasına gəldikdə, Ağazadə deyib ki, bununla bağlı əlavə şərh verməyə ehtiyac yoxdur.
"Qarabağ və Respublika Uğrunda Hərəkat"ı Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları 2009-cu il martın 18-də Konstitusiyaya təklif olunan əlavə və dəyişikliklərlə bağlı keçirilən referendum ərəfəsi təsis ediblər.
Məqalə müəllifi ilə əlaqə ünvanı: [email protected]
