Azərbaycan, Bakı, 23 fevral / Trend , müxbir Y.Ostapenko/
Assambleyanın prezidenti Joao Soareşin rəhbərliyi ilə ATƏT Parlament Assambleyası nümayəndə heyəti və Dağlıq Qarabağ üzrə xüsusi nümayəndə Qoran Lenmarker martın ortalarında Azərbaycana üçgünlük səfər edəcək. Bu barədə ATƏT-in rəsmi məlumatında deyilir.
ATƏT PA-nın bütün Cənubi Qafqaz regionuna səfər çərçivəsində Azərbaycana səfəri mart ayının 13-16-da təşkil ediləcək. Soareş və Lenmarkerin səfəri martın 9-10-da Gürcüstandan başlayacaq, martın 10-13-də Ermənistanda davam edəcək və Azərbaycanda başa çatacaq.
Bu, ATƏT PA sədrinin regiona ilk rəsmi səfəridir.
Hər üç ölkədəki danışıqlar Ermənistan-Azərbaycan, Dağlıq Qarabağ münaqişəsinin həlli prosesinə, həmçinin 2008-ci ilin avqust münaqişəsindən sonra Gürcüstandakı vəziyyətə aid olacaq.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır.
1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.