Azərbaycan, Bakı, 30 aprel /Trend, müxbir K.Zərbalıyeva/
Azərbaycan Dövlət Miqrasiya Xidmətində ATƏT-in nümayəndələri ilə görüş keçirilib.
DMX-nin mətbuat xidmətindən cümə günü Trend-ə verilən məlumata görə, Azərbaycanda qısamüddətli səfərdə olan ATƏT/DTİHB-in insan alverinə qarşı mübarizə üzrə baş müşaviri xanım Şivaun Skanlan və ATƏT-in Bakı ofisinin rəhbərinin müavini xanım Melissa Stonen ilə görüşdə Dövlət Miqrasiya Xidmətinın yaranması, fəaliyyəti, qarşıya qoyulan məqsədlər və qısa müddət ərzində görülmüş işlər, əldə olunmuş nəticələr barədə ətraflı məlumat verilib.
Miqrasiya idarəetmə mexanizminin təkmilləşdirilməsi, Azərbaycana gələn əcnəbilərə və vətəndaşlığı olmayan şəxslərə ölkə ərazisində qanuni əsaslarla yaşamaları və əmək fəaliyyəti ilə məşğul olmaları üçün müvafiq icazələrin verilməsi, onların yaşayış yeri üzrə qeydiyyata alınması prosedurunun sadələşdirilməsi məqsədilə "Bir pəncərə" prinsipinin tətbiqindən danışılıb.
Beynəlxalq təcrübənin öyrənilməsinə böyük önəm verildiyi, bu məqsədlə xidmət əməkdaşlarının bir çox Avropa ölkələrinə ezam olunduğu qonaqların nəzərinə çatdırılıb.
Xanım Stone 3 il ərzində xidmət tərəfindən həyata keçirilən tədbirləri yüksək qiymətləndirib, ATƏT-in Bakı Ofisinin hər zaman yardıma hazır olduğunu vurğulayıb.