Gürcüstan, Tbilisi, 7 may /Trend, müxbir N.Kirsxaliya /
Gürcüstan Parlamentinin keçmiş spikeri, "Demokratik hərəkat - vahid Gürcüstan" müxalifət partiyasının hazırkı lideri Nino Burcanadze Böyük Vətən müharibəsindəki Qələbənin şərəfinə keçiriləcək paradda iştirak edəcək. Partiyanın mətbuat xidmətindən Trend-ə verilən məlumata görə, Burcanadze parada fəxri qonaq kimi dəvət olunub.
O da bildirilib ki, Burcanadze Moskvaya səfəri çərçivəsində rəsmi görüşlər keçirməyəcək.
Bu il Qələbənin 65 illiyi xüsusi vüsətlə qeyd edilir və dünyanın bir çox ölkələrinin liderləri Moskvaya toplaşacaq.
