Özbəkistan, Daşkənd, 16 iyun /Trend, müxbir D.Əzizov/
ABŞ-ın Özbəkistandakı səfirliyi Qırğızıstanın cənub vilayətlərində baş verən zorakılıq aktları ilə bağlı ciddi narahatlıq keçirdiyini bildirən bəyanat yayıb.
"Biz Özbəkistan hökumətinin və xalqının Fərqanə vadisində sığınacaq axtaran qaçqınları qəbul etmək və yerləşdirmək səylərini bəyənirik və buna BMT və digər təşkilatlar vasitəsilə kömək etməyə hazırıq", - bəyanatda qeyd olunub.
Xəbər verildiyi kimi, iyunun 10-da Qırğızıstanın cənubunda toqquşmalar başlayıb. Ölkənin cənub paytaxtı adlandırılan Oş şəhərində qırğız və özbəklər arasında toqquşmalar baş verib. Respublikanın müvəqqəti hökuməti şəhərdə, Oş vilayətinin bəzi rayonlarında və Cəlalabad vilayətinin Cəlalabad və Suzak rayonlarında fövqəladə vəziyyət elan edib.
Toqquşmalarda ölənlərin sayı rəsmi məlumatlara görə 200 nəfəri ötüb.
Bu müddət ərzində Qırğızıstanın cənub vilayətindən olan 75 min etnik özbək Özbəkistan sərhədini keçiblər.
Özbəkistan hökuməti Əndican vilayətinin Qırğızıstanla həmsərhəd rayonlarında 30 düşərgə təşkil edərək qaçqınları yataq dəstləri, yemək və dərmanlarla təmin edib.