Azərbaycan, Bakı, 22 iyun /Trend, müxbir S.Süleymanov/
Qazaxıstanda İran İslam Respublikasının yeni səfiri Qurban Seyfi vəzifəsinin icrasına başlayıb. Səfiri çərşənbə axşamı öz xahişi ilə Qazaxıstan Məclisinin sədri Ural Məhəmmədcanov qəbul edib. Bu barədə parlamentin mətbuat xidmətinin məlumatında deyilir.
"Spiker əmin olduğunu bildirib ki, səfirin başlayan diplomatik missiyası iki ölkə arasında əlaqələrin möhkəmlənməsinə və genişlənməsinə təkan olacaq", - məlumatda deyilir.
Məlumata əsasən, həmsöhbətlər həm regional, həm də beynəlxalq səviyyədə əməkdaşlıq üçün potensialın olduğunu vurğulayıblar. "İslam Konfransı Təşkilatı, Şanxay Əməkdaşlıq Təşkilatı və digər beynəlxalq təşkilatlar çərçivəsində qarşılıqlı əlaqələrin perspektivi görünür", - məlumatda qeyd olunub.
Seyfi Məhəmmədcanova iranlı həmkarının İrana səfər etməklə bağlı dəvətini çatdırıb.
