Azərbaycan, Bakı, 3 noyabr /Trend, müxbir Т.Cəfərov/
Tehran İranın razılığı olmadan Xəzərin statusunun müəyyənləşdirilməsi üzrə istənilən qərarın qəbulunu ümumiyyətlə, yolverilməz hesab edir.
"Xəzərin hüquqi statusu qarşılıqlı anlaşma əsasında müəyyən olunmalıdır və İranın razılığı olmadan bu istiqamətdə istənilən qərarın qəbulu yolverilməzdir. Bu, Tehranın prinsipial mövqeyidir", - çərşənbə günü Trend-ə İran Prezidentinin Xəzər problemləri üzrə xüsusi nümayəndəsi Məhəmməd Mehdi Axundzadə deyib.
"İranın razılığı olmadan dənizin statusu üzrə heç bir sənəd imzalana bilməz", - o, əlavə edib.
"Bu gün Xəzər dənizinin hüquqi statusunun müəyyən olunması üzrə müzakirələr 1921 və 1940-cı illərdə keçmiş Sovet İttifaqı və İran arasında imzalanmış sənədlər əsasında aparılır. Biz İranın milli maraqlarına cavab verən və gələcəkdə cəmiyyətin tələblərinə cavab verən hüquqi statusu müəyyən etməyə çalışırıq", - Axundzadə Bakıda beş Xəzəryanı ölkənin xarici işlər nazirləri müavinlərinin Xəzərdə təhlükəsizlik sahəsində əməkdaşlıq haqqında saziş layihəsinin razılaşdırılması üzrə iclasında iştirakı zamanı deyib.
Nazir müavini digər Xəzəryanı ölkələri İranın mövqeyinə hörmətlə yanaşmağa çağırıb.
"Xəzərdə sona qədər istifadə olunmamış böyük potensial var və bütün Xəzəryanı ölkələr bundan istifadə edə bilərlər", - Axundzadə deyib.
Xəzəryanı öləkələr 2003-cü ilin noyabrında Xəzərin dəniz mühitinin müdafiəsi üzrə Çərçivə Konvensiyası imzalayıblar.
1998-ci ilin iyulunda Qazaxıstanla Rusiya arasında yeraltı sərvətlər üzrə suveren hüquqların həyata keçirilməsi məqsədi ilə Xəzərin şimal hissəsində dəniz dibinin bölünməsi haqqında saziş imzalanıb, 2002-ci ilin mayında isə həmin sazişə müvafiq protokol imzalanıb.
2001-ci il noyabrın 29-da və 2003-cü il fevralın 27-də Qazaxıstanla Azərbaycan arasında Xəzər dənizinin dibinin bölünməsi haqqında saziş və ona müvafiq protokol imzalanıb.
Həmçinin, 2003-cü il mayın 14-də Qazaxıstan, Azərbaycan və Rusiya arasında Xəzər dənizinin həmsərhəd hissələrinin bölünməsi xəttinin qovuşma nöqtəsinə dair saziş imzalanıb.
Çərşənbə günü Bakıda beş Xəzəryanı ölkənin xarici işlər nazirləri müavinlərinin Xəzərdə təhlükəsizlik sahəsində əməkdaşlıq haqqında saziş layihəsinin razılaşdırılması üzrə iclası başlayıb.
Layihənin Xəzəryanı dövlət başçılarının noyabrın 18-də Bakıda keçiriləcək növbəti sammitində müzakirəyə çıxarılması planlaşdırılır.