Qazaxıstan, Astana, 29 noyabr /Trend, müxbir A.Maratov/
ATƏT-in dekabrın 1-2-də Astanada keçiriləcək sammitinin büdcəsi 11 milyon avro təşkil edir. Bu barədə bazar ertəsi Astanadakı brifinqdə ATƏT-in sammitinə hazırlıq üzrə icraçı katib Serjan Abdıkərimov deyib.
"Sammitin büdcəsi 11 milyon avro təşkil edir. Onun dörddə bir hissəsi ATƏT-in üzv ölkələrinin payına düşür", - Abdıkərimov bildirib.
Bunula yanaşı, o xatırladıb ki, sammitin keçirilməsi üzrə xərcləri ATƏT-in üzv ölkələri, qalan hissəni isə qəbul edən ölkə öz üzərinə götürür.
"Sammitin keçirilməsi üçün xərclərin payı ATƏT-in üzv ölkələrinin ödədikləri üzvlük haqlarının həcminə uyğun hesablanır", - o qeyd edib.
Abdıkərimovun sözlərinə görə, dekabrın 1-2-də Astanada keçiriləcək sammitin qonaqlarının və iştirakçılarının ümumi sayı beş mindən çoxdur.
"Bu günə 2,5 mindən çox nümayəndə, 1200 KİV nümayəndəsi, müxtəlif QHT-lərin 600 nümayəndəsi qeydiyyatdan keçib", - o vurğulayıb.
Onun sözlərinə görə, 28 dövlət başçısı, 10 hökumət başçısı, 7 Baş nazir müavini və 14 nazir öz iştiraklarını təsdiqləyiblər.