...

Türkiyə müxalifəti "WikiLeaks"in nəşrlərindən siyasi mübarizədə istifadə edir – Türkiyə kəşfiyyatının sabiq analitiki

Siyasət Materials 2 Dekabr 2010 20:30 (UTC +04:00)
Türkiyənin müxalif Cümhuriyyət Xalq Partiyası "WikiLeaks" internet resursunun dərc etdirdiyi sənədlərdən hakim Ədalət və İnkişaf Partiyasına qarşı istifadə etməyə çalışır.
Türkiyə müxalifəti "WikiLeaks"in nəşrlərindən siyasi mübarizədə istifadə edir – Türkiyə kəşfiyyatının sabiq analitiki

Azərbaycan, Bakı, 2 dekabr /Trend, müxbir A.Axundov/

Türkiyənin müxalif Cümhuriyyət Xalq Partiyası "WikiLeaks" internet resursunun dərc etdirdiyi sənədlərdən hakim Ədalət və İnkişaf Partiyasına qarşı istifadə etməyə çalışır. Bu barədə telefonla İstanbuldan Trend-ə cümə axşamı Türkiyə kəşfiyyatının sabiq analitiki Mahir Kaynak bildirib.

"Hökumətin mövcud siyasətinə qarşı alternativ təklif edə bilməyən müxalifət Baş nazir Rəcəb Tayyib Ərdoğanı istefaya getməyə məcbur etmək üçün bu nəşrlərdən istifadə edir", - Kaynak deyib.

Onun sözlərinə görə, Ərdoğanın istefası partiyanın dağılmasına gətirib çıxaracaq ki, bu da həmin sənədlərin dərc edilməsində əsas məqsəddir.

"WikiLeaks"in yerləşdirdiyi 250 mindən çox sənədin səkkiz minə yaxın faylı ABŞ diplomatlarının Türkiyədəki yazışmalarıdır. Yazışmalardan məlum olur ki, Ərdoğanın İsveçrənin səkkiz bankında hesabı açılıb, bundan başqa məlumat verilir ki, o, öz partiyasında islamçıları toplayıb.

CNN Türk telekanalının məlumatına görə, Rəcəb Tayyib Ərdoğan çərşənbə günü Ankaradakı çıxışı zamanı "WikiLeaks" internet resursunun dərc etdiyi sənədlərdə ona aid edilən məlumatların təsdiq ediləcəyi təqdirdə, istefaya gedəcəyinə söz verib.

"Mənim İsveçrə banklarında qəpiyim belə yoxdur. Mənim ünvanıma səslənən böhtanlar təsdiqlənərsə, mən dərhal öz vəzifəmi tərk edəcəyəm", - Türkiyənin Baş naziri Ankaradakı çıxışında bildirib.

Çərşənbə günü axşam keçirilən partiyanın İcraiyyə Komitəsinin iclasında Baş nazir Ərdoğanın tapşırığı ilə Türkiyə nümayəndələrinin ünvanına səsləndirdikləri fikirlərə görə ABŞ diplomatlarına qarşı iddia qaldırılaraq, maddi təzminatın tələb edilməsi ilə bağlı qərar qəbul edilib.

Xəbər lenti

Xəbər lenti