Azərbaycan, Bakı, 16 dekabr /Trend, müxbir A.Axundov/
Türkiyə və İsrail münasibətlərin əvvəlki səviyyəsinə qayıtmaq üçün yaxşı şansa malikdirlər, lakin bu müəyyən vaxt tələb edir. İsrail xarici işlər nazirinin keçmiş müavini, Knessetin sabiq üzvü Yəhuda Ben Meir Trend-ə bildirib.
Onun sözlərinə görə, bununla yanaşı, indi əvvəlki münasibətlərin bərpası haqqında nəsə demək tezdir.
Yaxın keçmişədək hərbi-siyasi sahədə sıx əməkdaşlıq edən Türkiyə ilə İsrail arasında münasibətlər mayın 31-də İsrail hərbçilərinin Qəzzaya humanitar yük aparan "Azadlıq donanması"na hücumundan sonra kəskin pisləşib. Doqquz Türkiyə vətəndaşının həlak olduğu bu hücumun ardından Türkiyə hökuməti İsraillə münasibətlərə yenidən baxacağını elan edib.
Dekabrın əvvəlində İsrailin Baş naziri Benyamin Netanyahu Türkiyənin Baş naziri Rəcəb Tayyib Ərdoğanla telefon danışığı zamanı meşə yanğınlarının söndürülməsində İsrailə göstərilən köməyə görə təşəkkürünü bildirib. Daha sonra dekabrın 5-6-da Cenevrədə iki ölkənin nümayəndələrinin görüşü keçirilib.
"İsrail Türkiyə ilə yaxşı münasibətlərin bərpasında çox maraqlıdır və Türkiyə ilə əməkdaşlığa ölkənin xarici siyasətinin mühüm aspektlərindən biri kimi baxır. Düşünürəm ki, Türkiyədə də çoxları İsraillə münasibəbtlərin yaxşılaşmasını istəyir", - Ben Meir bildirib.
İsrailli ekspertin fikrincə, vəziyyətin gərginləşməsinə daha çox Baş nazir Ərdoğanın kəskin reaksiyası səbəb olub.
"Baxmayaraq ki, bundan əvvəl İsrail türkiyəli Baş nazirin sərt bəyanatlarına fikir verməyib. Netanyahu özünün bütün nazirlərinə bu bəyanatlara reaksiya verməməyi və vəziyyəti gərginləşdirməməyi tapşırıb", - Ben Meir bildirib.