Azərbaycan, Bakı, 17 dekabr /Trend, müxbir M.Əliyev/
Azərbaycan və Türkiyə arasında strateji tərəfdaşlıq və qarşılıqlı yardım haqqında müqavilənin təsdiq edilməsinə dair qanun layihəsi ratifikasiya olunması üçün Milli Məclisin dekabrın 21-də keçiriləcək iclasında müzakirəyə çıxarılacaq. Bunu cümə günü Trend-ə parlamentin Təhlükəsizlik və müdafiə komitəsinin üzvü Zahid Oruc bildirib.
"Azərbaycan Respublikası və Türkiyə Respublikası arasında strateji tərəfdaşlıq və qarşılıqlı yardım haqqında Müqavilə"ni Azərbaycan Prezidenti İlham Əliyev və Türkiyə Prezidenti Abdullah Gül avqustun 16-da İstanbulda imzalayıb.
"Azərbaycan və Türkiyə prezidentləri tərəfindən imzalanmış bu sənəd parlamentlərdə ratifikasiya edilərək hüquqi qüvvə alandan sonra iki ölkənin mənafelərinə və təhlükəsizlik maraqlarına cavab verən çox mühüm bir addım, iki ölkə arasında gələcək münasibətlər üçün yeni bir mərhələ olacaq", - Oruc bildirib.
Millət vəkilinin sözlərinə görə, bu sənəd Türkiyəyə Dağlıq Qarabağ məsələsində real hüquqi səlahiyyətlər verir. "Yəni bu münaqişə silahlı vasitələrlə tənzimlənməli olarsa, Türkiyə Azərbaycana lazımi yardımlar göstərmək üçün hüquqi cəhətdən səlahiyyət əldə edəcək", - Oruc bildirib.
O, həmçinin müqaviləni gələcəkdə regiondakı münasibətlərə qarşı müqavimət sənədi kimi dəyərləndirib.
Millət vəkilinin sözlərinə görə, sənədin preambulasında 1921-ci ildə imzalanmış Qars müqaviləsinə istinad olunur. "Bu da ermənilərin guya 1921-ci ildə imzalanmış sənədlərin tarixdə qaldığı, Naxçıvanın təhlükəsizliyi üçün heç bir rol oynamadığı kimi ifadələrinə cavabdır", - Oruc bildirib.
Türkiyə parlamentinin deputatı Mustafa Kabakçı cümə günü Trend-ə telefonla bildirib ki, hazırda "Azərbaycan Respublikası və Türkiyə Respublikası arasında strateji tərəfdaşlıq və qarşılıqlı yardım haqqında Müqavilə" Xarici İşlər Nazirliyindədir və parlamentə daxil olanda ratifikasiya edilmə vaxtı müəyyənləşəcək.
