Azərbaycan, Bakı, 27 dekabr /Trend, müxbir T. Hacıyev/
Azərbaycanın müxalif Azadlıq (AP), Milli Qurtuluş (MQP) və Böyük Azərbaycan partiyaları "Xalq Məclisi"nə qoşulmaqdan imtina edib. Bu barədə bazar ertəsi Trend-ə Azadlıq Partiyasının sədri Əhməd Oruc məlumat verib.
"İndiki halda bir qrup insanın müxalifətin birliyi adı ilə "qrant alveri"nə girməsinə göz yuma bilmərik. Müxalifətin forumuna QHT-lərin də çağırılması bu birliyin məqsədinin qrant almaq olduğundan xəbər verir", - Oruc əlavə edib.
Noyabrın 23-də Müsavat Partiyasının mərkəzi qərargahında 7 noyabr parlament seçkilərinin nəticələrini tanımayan namizədlərin forumu keçirilib.
"AXCP-Müsavat" seçki blokunun təşəbbüsü ilə keçirilən forumda Milli İstiqlal, Klassik Xalq Cəbhəsi, Azadlıq, Demokratik Azərbaycan Dünyası, Azərbaycan Xalq partiyalarının təmsilçiləri və müstəqil namizədlər və QHT nümayəndələri iştirak ediblər. Forumda parlament seçkiləri, seçkidən sonrakı vəziyyət müzakirə edilib.
Forumda, həmçinin Milli Məclisə alternativ qurumun - "Xalq Parlamenti"nin yaradılması təklifi səsləndirilib.
Müxalifətin növbəti forum dekabrın 28-də keçiriləcək.
Partiya sədri Trend-ə açıqlamasında onu da qeyd edib ki, bu gün Demokratiya Uğrunda İttifaqa daxil olan digər partiyalarla da müzakirələr aparılacaq.
