Bakı. Trend:
Azərbaycanın strateji coğrafi mövqeyi ölkəyə regional investisiya mərkəzinə çevrilmək üçün unikal imkan yaradır.
Trend-in tədbirdə iştirak edən müxbirinin məlumatına görə, bunu BMT-nin Ərzaq və Kənd Təsərrüfatı Təşkilatının (FAO) Azərbaycandakı nümayəndəsi Məhəmməd Nasar Hayat Bakıda İslam İnkişaf Bankı (İİB) Qrupunun İllik Toplantısı çərçivəsində keçirilən “Ənənəvi xarici yardım və rəsmi inkişaf yardımından kənara çıxan davamlı inkişaf üçün innovativ maliyyələşmə” adlı 8-ci DİM dialoqunda bildirib.
“Azərbaycanın Mərkəzi Asiya, Qafqaz və Yaxın Şərqi birləşdirən strateji coğrafi mövqeyi ölkəyə investisiyalar, ticarət, maliyyə və transsərhəd kapital axınları üzrə regional mərkəzə çevrilmək üçün unikal imkan yaradır”, – deyə o bildirib.
Nasar Hayat qeyd edib ki, Azərbaycanda davamlı və inklüziv artımın gücləndirilməsinə yönəlmiş iddialı islahatlar həyata keçirilir. Ölkə 2023–2026-cı illər üzrə Dayanıqlı Maliyyə Yol Xəritəsinin icrasında və milli yaşıl taksonomiya kimi əsas alətlərin hazırlanmasında mühüm uğurlar əldə edib. Bu isə milli maliyyə axınlarının ekoloji və sosial prioritetlərlə uyğunlaşdırılması üçün möhkəm əsas yaradır.
O, həmçinin əlavə edib ki, özəl kapital sadəcə əlavə maliyyələşmə mənbəyi deyil.
“Əgər biz Dayanıqlı İnkişaf Məqsədlərinə nail olmaq istəyiriksə, özəl kapital həyati əhəmiyyət daşıyır. Lakin onun tam potensialının üzə çıxarılması üçün əlverişli siyasət, etibarlı normativ-hüquqi baza, risklərin bölüşdürülməsi üzrə effektiv mexanizmlər və ən əsası, sektorlar və ölkələr arasında daha güclü tərəfdaşlıq əlaqələri lazımdır”, – deyə Nasar Hayat bildirib.
