Azərbaycan, Bakı, 26 sentyabr /Trend, müxbir T.Hacıyev/
Azərbaycanın müxalif Müsavat Partiyasının qurultayı yubanır.
Qurultayın keçirilməsi yerlərdə konfransların başa çatmasından asılıdır. Bunu bazar ertəsi Trend-ə Müsavat Partiyasının Məclis sədri Arzu Səmədbəyli bildirib.
Onun sözlərinə görə, yerlərdə konfranslar keçirildikdən sonra partiyanın Məclisi çağırılacaq və qurultayın vaxtı və yeri barədə qərar qəbul olunacaq.
Müsavat Məclisinin 2010-cu ilin dekabrında keçirilən iclasında qurultayın may-iyun aylarında keçirilməsi ilə bağlı qərar qəbul olunmuşdu.
Müsavat Partiyası 1911-ci ilin oktyabrında Bakıda yaradılıb. 1920-ci ilin aprelində Azərbaycan Sovet qoşunları tərəfindən işğal olunduqdan sonra Müsavat Partiyasının fəaliyyəti məhdudlaşıb və gizli fəaliyyət göstərməyə başlayıb.
1992-ci ilin noyabrında Müsavat Partiyasının III Bərpa Qurultayı keçirilib. Partiya ideologiyasının əsasında müsavatçılıq, türkçülük, müasirlik və liberallıq ideyaları dayanır. Siyasi sistemdə mövqeyi sağ-mərkəzçidir.